DILI, STLTIMORLESTE.com – Organizasaun non Govermentais Lokal Assosiasaun Haburas Atoni ba Naroman (AHABAN) iha Oecusse, iha loron Sesta (10/04/2026), hakat ba Palasiu Governu hodi ajusta proposta ba Apoiu Sosiedade Civil, atu kapasita Grupu Manajemen Fasilidade (GMF) atu kontinua expanda tan programa bee moos ba komunidade sira iha Postu Administrativu Oesilo no Pasabe hamutuk suku 8.
Informasaun nee hatoo husi Diretor Assosiasaun Haburas Atoni ba Naroman (AHABAN) iha Oecusse, Antonio Mala ba STL hafoin ajusta proposta iha Governu Timor Leste liu husi apoiu Sosiedade Civil iha palasiu Governu, Sesta (10/04/2026).
“Rezultadu ajustamentu proposta nee mai husi ita nia planu proposta ho planu orsamentu, planu programa neebe maka ita atu halo, liu husi hasae kapasitasaun ba komunidade neebe hela iha area rurais, liu-liu sira neebe asesu ba bee moos, liu-liu GMF,” dehan Diretor AHABAN, Antonio Mala.
Nia haktuir tan katak, durante nee sira implementa ona programa iha area rurais, haree iha progresu balun neebe halo ona liu husi halo ona reabilitasaun kona ba bee moos, tanba nee Sistema bee mos konsege finaliza ona, maibe parte balun labele apoiu ba Sistema nee, entaun AHABAN haree katak failha iha GMF, tanba nee maka presiza atu hadia ekipa GMF sira, iha area rurais liu husi formasaun kiik, kona ba administrasaun finansas ho GMF kona ba bee moos.
“Ita kontinua lao ho Sistema bee moos, tanba nee ita planea atu kontinua ho formasaun ba iha GMF, tanba nee dadaun identifika ona atu halao programa nee iha Postu Administrativu Oesilo nomos Pasabe, kompostu husi suku 8 neebe ita preve ona iha proposta nee. Proposta nee ita derizi mai iha governu Timor Leste liu husi Apoiu Sosiedade Sivil, ho montante orsamentu US$ 8.000, ida nee kategoria fundus kiik, tanba nee programa nee sei hahu iha fulan Abril no finaliza iha fulan Setembru tinan 2026, kuaze fulan 6,” dehan nia.
Nia espera katak Sistema bee moos neebe maka autoridade governu fo ona apoiu ba sosiedade civil liu husi Organizasaun non Govermentais Lokal nee, maka iha ona komitmentu atu halo, tanba nee esperansa atu komunidade sira bele asegura saida maka estabeles tiha ona, presiza atu haree didiak no tau matan, tenke sai nain ba iha Sistema neebe maka iha.
“Ita presiza atu hadia tan kondisaun bee moos iha fatin seluk tanba, neebe reabilitasaun bee moos nee, laos iha fatin ida deit, maibe sei kontinua iha fatin sira seluk, neebe fasilidade bee moos neebe maka hadia ona liu husi reabilitasaun, entrega ona ba iha autoridade lokal hanesan Xefe Suku ho sira nia membru suku hamutuk ho GMF atu nunee, sira tau atensaun no asegura Sistema sira neebe maka estabelese ona,” dehan nia.
Nia espera katak, liu husi ajustamentu proposta nee, iha Sistema balun bele lao ona ho Sistema regulamentu sira, tanba ida nee liga ho regulamentu, liga mos ho administrasaun, liga mos ho sira nia kompetensia ba iha GMF, tanba hahu ona iha parte balun neebe komunidade sira presiza.
Antes nee, iha fulan hirak liu ba, Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu hamutuk ho Xefe Departementu Aqua no Sanitaria (SAS) no Governu Nova Zelandia inaugura bee moos iha Aldeia Kabun, Suku Bobometo, Postu Administrativu Oesilo neebe finansia husi Governu Australia ba bee moos komunidade Kabun, jere husi NGO Lokal AHABAN.
(jos)
