DILI, STLTIMORLESTE.com – Eskola Ensinu Baziku no Sekundariu Nobel da Paz sei falta livru no ba oin eskola refere sei husu apoiu ba Ministeriu Edukasaun.
Lia hirak nee hatoo husi Jeremias P. de Jesus hanesan fundador Eskola Nobel da Paz ba STL iha nia knaar fatin Kintal Boot, Dili, Segunda nee (10/08/2026).
“Iha nee ami koalia konaba livru sei menus, nee duni ba oin hau sei husu apoiu livru ba ita nian Ministeriu Edukasaun, atu nunee ita nian estudante sira bele asesu ba iha livru sira nee, tanba bainhira laiha livru, oinsa mak ita nian estudante sira bele asesu ba iha livru sira nee, livru ba ita nian EBC no Sekundariu Nobel sei menus livru,” dehan nia.
Iha parte seluk, Diretor Eskola Sekundariu Jeral FINANTIL, Aniceto Berlelo katak, livru ba estudantes nee mak sei menus, maibe balun Ministeriu Edukasaun fo tan ona, nee duni livru neebe mak estudantes sira atu lee nee iha ona, estudantes sira barak mak seidauk mai eskola, depois de feriadu, horseik Segunda mak estudante sira foin tama iha eskola no barak mak seidauk tama.
“Hau hanoin livru ba ita nian estudantes sira nee mak seidauk kompletu ida, maibe ami halo pedidu hotu ona ba Ministeriu Edukasaun para bele fo apoiu livru mai ami nian eskola, livru neebe sei falta mak hanesan fizika no matematika, nee ami halo pedidu ona, tanba buku balun haruka ona mai, maibe seidauk kompletu ida, nee duni ami hakarak atu halo kompletu deit iha biblioteka ninia,” dehan nia.
Nunee mos Koordenador Gabinete Unidade Kurrikulu Nasional iha ME, João Mau Pelu hatete, Ministeriu Eduksaun liu husi Unidade Kurrikulu Nasional kontinua imprimi livru iha sentru impresaun.
“Primeiru, livru ita sei halo impresaun, balun ita distribui tiha ona, tanba livru ba setimu ano nian ita distribui hotu ona ba terseiru siklu setimu ano, ita distribui hotu ona, nee kuaze kada disiplina ita imprimi 27 mill, nee ita kalkula kuaze besik too ita nian estudantes ida-idak, maibe karik ita nian eskola balun seidauk too ou seidauk kobre ba ita nian estudantes ida-idak, ita husu ba eskola atu halo jestaun,” nia informa.
Nia dehan, konaba livru nee husu ba eskola idak-idak oinsa halo jestaun neebe mak diak, oinsa estudantes sira bele impresta livru sira nee, lori ba grupu ida rua bele uza hamutuk halo diskusaun, tanba oinsa sira bele estuda hamutuk, nee para estudantes bele uza didiak, iha momentu profesor atu hanorin nee estudantes grupu uza livru nee, depois profesor hanorin nee diak tebes.
(jac)
