DILI, STLTIMORLESTE.com – Husu nafatin ba inan aman sira neebe oan ho kondisaun defisiente labele husik iha uma, maibe sira presiza asesu ba edukasaun.
Asuntu nee hatoo husi Diretor Nasional Edukasaun Inkluzivu Asaun Sosial Eskolar, Fernando Soares ba STL iha nia knaar fatin, Sesta nee (26/06/2026).
Nia dehan, nafatin fo hanoin ba inan aman sira neebe oan defisiente, nee presiza haruka sira asesu ba edukasaun, hanesan ho sira nian maluk sira seluk.
“Ita husu ba ita nian inan aman sira neebe hela iha area remotas, oinsa atu prepara oan defisiente sira bele asesu ba edukasaun no labele husik iha uma deit, nee labele, tanba sira mos iha direitu hetan asesu edukasaun, hanesan ho sira nian maluk sira seluk, tanba nee ita fo hanoin nafatin ba família lori oan ba eskola,” dehan Fernando.
Nia afirma, labarik sira iha direitu asesu ba edukasaun hahu husi edukasaun pre eskolar, ensinu baziku, sekundariu no tekniku vokasional, nunee inan aman sira presiza lori sira ba eskola neebe besik, bainhira hahu matrikula nee bele lori sira ba iha eskola, maibe durante nee inan aman sira lori sira nian oan ba eskola no fo apoiu oan sira nian estudu ba too iha nibel ensinu superior.
“Aleinde ita husu Inan aman lori oan ba eskola, ami mos daudaun nee atualiza hela dadus defisiente iha nibel ensinu baziku, maibe dadus nee foin atualiza, ita seidauk hatene dadus labarik defisiente nee nain hira mak asesu ona ba edukasaun. Hau hanoin atulizasaun dadus labarik defisiente daudaun nee lao hela ona iha munisipiu balun,” nia esplika.
Nia akresenta, foin atualiza dadus defisiente iha ensinu baziku, maibe tuir planu neebe mak iha sei atualiza dadus iha nibel ensinu sekundariu no tekniku vokasional, tanba sei halo fazeadamente, nee duni atualiza ba sekundáriu no tekvo nee seidauk lao, tanba sei haree ba iha ensinu baziku.
“Bainhira atualiza dadus nee remata ita bele hatene ona dadus lo-loos labarik defisiente hira mak asesu eduksaun formal iha nibel ensinu baziku, nunee ninia prosesu atualizasaun dadus nee sei lao hela,” katak nia.
Nunee mos Xefe Suku Comoro, Eligio Jose da Silva Marcal dehan, autoridade lokal sempre fo hanoin ba inan aman neebe iha oan defisiensia labele taka dalan ba sira atu asesu ba iha edukasaun no formal non formal.
“Hau hakarak apela ba inan aman neebe sira nia oan defisiensia iha Suku Comoro katak, karik iha oan ou alin sira neebe mak ho kondisaun defisiensia karik husu inan aman sira atu labele taka dalan ba sira asesu ba iha edukasaun, tanba sira iha direitu atu aprende buat ruma iha eskola hanesan ho sira nia maluk sira seluk,” nia informa.
(jac)
