DILI, STLTIMORLESTE.com – Depois de ezame segundu periodu tama kedas feriadu, no ohin Segunda feira estudantes sira tama fali eskola hanesan baibain.
“Hanesan ita hotu hatene katak, depois de ita halao ezame segundu periodu iha fulan kotuk, ita nian estudantes sira simu tiha kaderneta sira feriadu ohin dia 3 mak ita nian estudante sira tama fali eskola..Nee duni hamoos sala de aula sira nee para ita nian estudantes sira bele halao prosesu ensinu aprenduzajen iha ami nian eskola,” afirma Narciso Pinto Soares Vieira da Costa hanesan Gabinete Apoiu Tekniku (GAT) Manleuana ba STL iha nia knaar fatin, Segunda nee (03/08/2026).
Nia dehan, durante estudante sira feriadu nee sira partisipa iha atividades desportu ninia, tantu estudantes feto no mane neebe mak iha talentu ba desportu nian sira partisipa iha jogu oin-oin, nee duni iha atividades desportu neebe estudantes sira barak mak partisipa iha atividades ida nee.
“Maske ohin ami nian estudantes sira hahu tama fali ona eskola, maibe antes nee ami nian estudantes sira hola parte iha atividades extra nian, hanesan hola parte iha joga voly no basket ninia. Ami nian estudantes laos mane deit mak partisipa jogu nee, maibe ami nian estudantes feto sira mos partisipa hotu,” tenik nia.
Nunee mos Carlos Correia hanesan Diretor Eskola Baziku Central (EBC) Manleuana dehan, bainhira estudante sira tama fali eskola nee, primeiru sira tenke hamoos sala de aula hafoin profesor sira bele halao prosesu ensinu aprendizajen iha sala de aula.
“Bainhira ita nian estudante sira tama fali eskola nee, primeiru sira tenke hamoos sala de aula sira nee, hafoin profesor sira bele halao prosesu ensinu aprendizajen iha sala de aula, tanba ita feriadu semana ida resin, nunee tama fali nee ita tenke hamoos sala de aula sira nee halo mos para halao aprendizajen,” nia informa.
(jac)
