DILI, STLTIMORLESTE.com – Padre Richardo Pasang, SVD hatete, ohin igreja katolika selebra loron Saun Joaun Bosco, apostolu joven sai lideransa igreja.
Padre Richardo Pasang hatoo lia hirak nee ba STL liu husi nia refleksaun diaria, Sesta nee (31/01/2025).
Nia hatete, semana III do tempu komum memoria Saun Joaun Bosco Heb. 10 : 32 – 39 Marc. 4 : 26 – 34.
“Ita sempre rona espresaun katak joven, adolescentes no kriansas mak esperansa ou igreja no nasaun nia futuru. Maibe, se mak tau atensaun ba sira? ou sira rasik rekonhese sira nia aan nuudar esperansa no futuru igreja no nasaun nian? Saun Joaun Bosco neebe ita komemora loron ohin mak apostolu dos joven. Nia fiar katak joven sira mak futuru igreja no nasaun lo-loos neebe lori esperansa ba buat hotu-hotu. Tan nee, ninia prinsipiu mak nee, husik joven sira laos deit rona katak ema barak hadomi sira aan, maibe sira sente duni katak ema hadomi sira,” dehan Padre Richardo.
Padre Richardo hatete, ideais no luta husi Saun Joaun Bosco loke ema nia prespektiva atu bele komprende evanjelhu ohin loron.
“Maromak nia reinu iha ona ita leet no dezenvolve aan nafatin, hanesan ema ida kuda fini iha rai, fini moris boot daudaun nia mesak hamoris aan, uluk liu nia hun, tuir mai nia fulin, ikus liu trigu tasak ho fulin. Perguntas ba ita ema neebe kari fini nee, hatene ka lae too sai hanesan nee? Hanoin buat hirak nee didiak, ita hetan katak prosesu hotu mai husi kbiit Maromak nian. Hanesan mos mostarda musan kiik neebe kuda iha rai, maibe kuda tiha hahu moris, sai boot liu hotu modo sira iha toos laran hodi hatubun sanak mesak bobo tatu, nunee manu sira lalehan nian bele hamahan aan iha nia mahan,” katak Pe.
Perguntas iha momentu ida nee, prosesu hirak nee lao didiak deit ka lae? serteza lae. Joven, adolescentes no kriansas hasoru dezafiu no difikuldades boot iha sira nia luta atu bele sai igreja no nasaun nia futuru. Hanesan mos reinu Maromak nian hasoru difikuldade barak iha ema sira leet neebe taka sira nia aan.
Iha biban nee, Padre mos husu loron Dom Bosco nia neebe harohan ba Nain Jesus atu tulun ema idak-idak iha nia moris loron-loron nian.
(eme)