DILI, STLTIMORLESTE.com – Organizasaun Mundial Saude (OMS) iha kolaborasaun ho Governu liu husi Ministeriu Saude (MS) no Ministeriu Edukasaun (ME) halao lansamentu formasaun ba profisional saude sira, atu halo peskiza kona-ba Neglected Tropical Diseases (NTDs) iha Timor Leste, hanesan Trachoma, frambusia no Soil-transmitted helminthiases.
Reprezentante OMS, Arvind Mathur dehan, iha peskiza ba moras tolu nee OMS fo apoiu ba Ministeriu Saude no Ministeriu Edukasaun iha termu tekniku no fundus.
“Ami kontente tebes bele kolabora ho Ministeriu Saude no Ministeriu Edukasaun, ba atividade ida nee ami foka liu ba moras tolu mak hanesan Trachoma infesaun matan, frambusia Infeksaun Kulit no Soil-transmitted helminthiases mak lumbringa neebe daet husi rai,” hatete Reprezentante OMS, Arvind ba jornalista sira iha ETDA Dili, Tersa (25/02/2025).
Arvind Mathur esplika, OMS apoia MS, ME no apoia ekipa peskiza neebe oras nee daudaun partisipa iha formasaun no mos implementasaun peskiza iha terenu. Nunee ekipa konjunta sira neebe sei halao peskiza husi Universidade Nasional Timor Lorosae (UNTL) no INSPTL, neebe inklui reprezentante mediku husi munisípiu 13 inklui RAEOA, no formasaun nee sei halao durante loron ida.
Iha fatin hanesan, Diretora Prestasaun Saude iha Ministeriu Saude, Terlinda da Conçeicão Barros dehan, objetivu husi estudu nee atu garante katak, dadus kona-ba moras NTDs sae no tun, karik moras ida nee la sofre husi komunidade bele mos elimina iha TL no hetan sertifikadu husi OMS.
“Treinamentu nee antes fo tiha ona ba ekipa sira iha 2015 ba leten ami fahe ai-moruk masal ba komunidade iha uma hotu-hotu, hanesan ai-moruk lumbriga, ainpotis, no ai-moruk scabies, maibe moras sira nee balu dala barak ema ignora, maibe sofre husi ita nia sosiedade, tanba nee husi tinan 2015 too 2019 ita fahe ona aimoruk,” nia deklara.
(jen)
