DILI, STLTIMORLESTE.com – Misionariu Antigu husi Kongregasaun Jesuíta, Padre João Felgueiras, SJ, nunka husik Timor oan iha tempu funu no terus laran, hodi hatudu ezemplu santidade no dedikasaun boot ba povu Timor Leste too nia hakotu iis iha idade avansadu tinan 105.
Deklarasaun nee hatoo husi Padre Domingos Alves da Costa, ba STL iha Rezidensia Kongregasaun Jesuita Taibesi, Díli, Sabadu (04/06/2026).
Padre Domingos Alves da Costa haktuir, matebian Padre João Felgueiras nuudar Amu neebe sentenariu no sai sasukat ba moris santu, sosial, no umanu ba komunidade hotu. Matebian hafoin mai iha Timor-Leste dezde tinan 1971, no iha tempu neeba mos asume kargu nuudar Reitor iha Seminariu durante tinan haat ka lima.
“Amu ida neebe haraik domin boot ba Timor oan sira no mos ba rai Timor. Tanba nee mak iha funu 1975, sira la ses husi Timor, maibe simu susar no terus hamutuk ho povu, la halai no lá ses. Nia rasik deklara katak mate iha Timor hanesan Misionariu antigu sira,”dehan Padre Domingos.
Padre Domingos mos esplika katak, durante periodu funu nian, matebian ho ninia kolega Padre José Martins, SJ, nafatin akompanha povu liuhusi orasaun no korajen. Maske iha tempu balun hasoru dezafiu atu tama fali Timor, liuhusi tempu Bispu Dom Carlos Filipe Ximenes Belo, Amu Lulik nee konsege tama duni no haruka nia atu aprende tetun iha Soibada durante tinan ida hamutuk ho Amu Mateus.
Iha tinan 1999, liuliu iha pasajen tempu konsulta Popular, Padre João ho nia kolega sira mos harohan makas no halo kontaktu barak ba rai liur hodi apoia luta ba ukun an.”Povu deve barak tebes ba sira nia orasaun no hahalok,”Padre Domingos haktuir.
Aleinde parte espiritual, Padre João Felgueiras mos konhesidu nuudar ema nonok, simples, maibe iha fiar neebe metin hodi lori ema hotu lao iha dalan Jesus Kristu nian. Nia mos fo apoiu sosial no umanutariu barak, inklui ajuda labarik kiak sira hodi ba eskola iha rai seluk, dezde okupasaun Indonezia nian too ukun an.
Iha fatin hanesan sarani José Piedade mos haktuir hodi fo sasin katak, nia konhese Amu Lulik nee iha tinan barak ona. Padre João Felgueiras nuudar edukador neebe eduka nia alin rasik, neebe agora Primeiru Jesuíta iha Timor-Leste, Padre João Inocencio Piedade.
“Sentimentu nuudar aman santu ida, iha hanoin saudade tanba uluk Amu nee ba ami nuudar família ida, tanba sempre ba uma konversa ho ami.Sarani Timor-Leste lakon figura diak, hela deit saudade ho mata been, tanba oras nee nia iha ona Maromak nia kadunan santu,”dehan José.
José Piedade mos konfirma katak, antes Padre João moras, nia sempre dehan katak, nia lakohi fila ba nia rai, maibe hakarak mate duni iha Timor-Leste, nuudar sinal domin boot ba sarani sira.
Entretantu tuir ajenda neebe fo sai ona, iha loron Tersa (07/07/2026), Kadaver Padre Joao Felguieras sei halao transladasaun husi Igreja Balide ba Igreja Katedral Dili. Iha fatin refere, sei halao Misa Regueim neebe hahu iha tuku 10:00 dader, no hafoin ritual relijiozu nee remata, sei kontinua kedas ba halot iha Semiteiru Metinaro.
(car)
