DILI, STLTIMORLESTE.com – Relasiona ho Pasiente Marilio Lay ho idade 13 sofre kankru kakorok, Governu liu husi Ministeriu Saude (MS) halo ona aprovasaun maibe seidauk bele transferensia ba Hospital Malazia, tanba hospital nee seidauk fo konfirmasaun bainhira mak pasiente nee atu sai.
Diretora Nasional Servisu Apoiu Hospitálar iha MS, Maria Santina Gomes hatete, informasaun neebe espalha iha media sosial dehan pasiente nee seidauk hetan aprovasaun husi Ministra Saude, Elia dos Reis Amaral nee lalos.
“Ida nee informasaun neebe sala, tanba Pasiente Marilio nee hetan aprovazaun iha kedas fulan kotuk, maibe husi hospital mak seidauk fo konfirmasaun bainhira mak nia sai,” dehan nia ba jornalista iha Kaikoli, Tersa (11/06/2026).
Nia afirma, tanba nee mak MS buka hela meius no solusaun para semana ida nee nia laran bele sai ba hospital KPJ Malazia nian.
“Ami halo nafatin konfirmasaun ba hospital nee, tanba sa mak seidauk simu. Baibain dala barak laiha resposta too agora, maibe ami sei buka solusaun para oinsa nia bele sai iha semana nee nia laran,” tenik nia.
Nia hatutan, husi parte diresaun nee halo hela komunikasaun ho familia pasiente, tanba loro-loron sira mai hela iha nee. Neebe hein deit depois mak diresaun sei informa.
Iha sorin seluk liu husi beranda facebook ho naran Bella Galhos hatete, alin Marilio ho idade 13. Nia presiza tratamentu rapido iha Malazia, tanba sofre kankro kakorok.
Tuir nia, dokumentos kompletu hotu ona, junta mediku aprova tiha ona ninia tratamentu iha Malazia, maibe familia kontinua hein ba hein atu bainhira los alin oan nee bele lori sai ba Malazia.
Nia husu favor ba Ministra Saude atu salva alin oan neebe idade kiik los, antes tarde.
“Durante semana 3, ami tenta halo kontaktu ba parte hotu. Visi Ministru Saude tenta nia kbit tomak, nafatin, too agora familia seidauk hetan serteza ida bainhira Alin Marilio Lay bele ba Malazia,” katak nia.
Nia hatutan, Marilio kontinua tama no sai hospital, hodi hein milagre husi Ministra Saude.
(dom)
