Pasiente Mate Tanba Laiha Aimoruk, Nee Viola Direitu Umanu

Peskizador AJAR, Inocencio de Jesus Xavier. (Foto: STL/Emerenciana Pinto)

DILI, STLTIMORLESTE.com – Pasiente ida neebe mate iha Hospital referal Baukau tanba deit aimoruk laiha, ida nee sosiedade sivil konsidera viola direitu umanu.

Kestaun nee hatoo husi Peskizador AJAR, Inocencio de Jesus Xavier ba jornalista sira iha nia knaar fatin, Farol, Dili, Kinta (23/01/2025).

“Nee violasaun diretu umanu grave, nee so iha ita nia rai mak bele akontese ida nee, ema mate tiha mak ministru ho diretor sente buat nee laek ida, maibe ema nia rai sira neebe sira ba beibeik nee lalika deit dehan ema mate, aimoruk laiha deit mos sira rejigna aan, ita nia laiha, ema mate loron-loron aimoruk laiha mos ministra sente buat ida la kona, diretor mos la sente buat ida,” dehan Inocencio.

Nia hatutan, hanesan sosiedade sivil no ida neebe luta ba justisa no direitu umanu rekomenda ba familia matebian atu halo prosesu hasoru Governu, liu-liu hasoru Hospital referral Baukau, hodi prosesu ema sira nee, prosesu ida neebe halo jestaun.

“Prosesu ida neebe halo jestaun hatene katak doutor sira fo aimoruk tenke iha aimoruk, se laiha aimoruk dehan laiha, entaun tenke kriminaliza mak sira neebe jere Hospital Baukau, tanba sira inkapasidade, sira nia ignoransia, ikus mai afeita sira nia vida nee tenke kriminaliza no investiga, tanba nee hau husu ba familia no sosiedade sivil iha Baukau halo akompanhamentu ba familia keixa mak sira neebe jere hospital nee, liu-liu Diretor Jeral nebe tau matan ba kontrolu sira nee keixa sira, tanba sira abandona sira nia responsabilidade,” dehan nia.

Nunee mos Visi Diretor HAK, Antonino de Limas fo solidaridade ba familia neebe mak lakon nia familia, tanba deit aimoruk iha Hospital referral Baukau laiha. No sente triste bainhira pasiente ba konsulta maibe aimoruk laiha.

“Bainhira pasiente sira ba Hospital signifika sira tau sira nia konfiansa ba mediku sira atu atende ho didiak, ho hanoin katak, so iha hospital deit mak bele salva pasiente nia moris, mai ita se aimoruk mak nafatin problema ida nee sai preokupasaun,” katak nia.

Entretantu foin lalais familia matebian JF neebe hakotu iis iha Hospital Rejional Eduardo Xienes HoREX Baukau konsidera tanba aimoruk Livoteroxina ba tratamentu mak laiha.

(eme)

Share it :

Leave a Reply

Your email address will not be published. Required fields are marked *