DILI, STLTIMORLESTE.com – PLAN Internasionál Timor Leste estende Memorandum of Understanding (MoU) ho Kay Olo Sword Gusmão nuudar embaixador ba foinsae no diversidade durante tinan 3.
Serimonia asinatura MoU nee asiste direita husi Primeiru Ministru (PM), Kay Rala Xanana Gusmão iha Uma Mahon Xanana Reading Room, Bidau Lecidere, Sesta nee (14/02/2025).
PM Xanana husu ba Embaixador Kay Olo atu bainhira hamutuk ho joven sira tenke muda mentalidade, harii karakterístika foun.
Iha tinan 3 nee laos atu prepara foinsae sira atu sai hotu ministru, maibe atu fó netik hanoin ida katak Timor sei iha joven sira nia liman no kabas.
Primeiru Ministru konta katak, Kay Olo presta ona esforsu balu iha PLAN Internasional ho joven sira no fó hanoin bá joven sira atu fiar ba aan rasik.
“Hau tenke dehan lo-loos katak, laos tanba nia hau nia oan nee mak hetan previleiju sira nee. Maibe, hau bele hanorin sira nain 3 atu esforsu mesak. Bainhira sira sei kiik hau fó han oituan, depois sira nia inan moras bá tiha iha Australia la hetan osan, servisu NGO mak ajuda netik oituan. Sira nunka hetan apoiu husi hau nuudar aman. Nee laos tanba la gosta sira, maibe tanba hau gosta sira mak ha’u halo hanesan nee. Hau hakarak iha sira nia mentalidade tenke esforsu rasik,” Xanana Gusmão konta tuir.
Xefe Governu nee konta tuir katak, oan mane Alexandre oras nee daudaun servisu iha Aeroportu Austrália nian hanesan tula sasan sira lori ba aviaun. Kay Olo foin lalais iha IX Governu Konstitusional tama servisu iha Ministériu Obras Publiku maibé haruka sai tiha atu evita ema dehan, tanba aman Primeiru Ministru nune’e oan ba servisu iha neeba.
“Ida nee maneira ida atu hanorin no hau kontente tanba sira nain 3 esforsu aan mesak. Ida nee lisaun husi hau nia aan rasik, tanba uluk nee iha tempu kalan hau tenke ba tiha faan ikan hodi buka osan atu selu eskola iha Liceu,” Xanana Gusmão konta tan.
Ho lisaun no esperiensia moruk sira hanesan nee mak sai forsa ba Kay Rala Xanana Gusmão hodi hamosu karakter foun atu nia bele enfrenta problema no bele intende ema seluk nia susar.
“Tanba nee, ba hau nia oan nain 3 maske hau Primeiru Ministru, maibe sira nunka simu fulan-fulan, ida nee atu hanorin sira. Bainhira hau hetan buat ruma hau utiliza hodi ajuda fali ema seluk,” PM sublina.
Líde Nasional nee orgulhu ho papel PLAN Internasional nian tanba muda mentalidade foinsae sira nian liu husi programa oin-oin.
Iha fatin hanesan, Diretora Interina PLAN Internasional, Fátima Estrela Soares hateten, PLAN servisu hamutuk ho Kay Olo tinan 3 bá oin atu haree oinsá foinsae sira bele sai ajente transformasaun bá aan rasik no foinsae sira seluk.
Atu haree liu tan oinsa promove servisu entre joven ho joven, hodi sai modelu ida bá labarik sira no mós haforsa rede servisu entre joven sira iha Timor, oinsa haforsa abilidade lideransa ba foinsae sira atu bele halo kritika ida neebe ho solusaun estratejiku.
Nunee mos Embaixador Kay Olo partilha esperiensia durante hamutuk ho PLAN Internasional katak, aprende buat foun barak.
“Hau sente previleiju tebes-tebes no hatene ho di’ak maioria foinsae sira iha Timor seidauk asesu ba oportunidade neebe hau hetan. Agradese ba PLAN Internasional ba konfiansa neebe fo mai hau hodi asumi responsabilidade ida nee,” Kay Olo agradese.
Kay Olo hameno ba foinsae sira iha Timor laran tomak atu unidade hodi hateke ba oin, tanba futuru Timor nian iha foinsae sira nia liman.
(alb)
