DILI, STLTIMORLESTE.com – Primeiru Ministru (PM), Kay Rala Xanana Gusmão promete ho Orsamentu Jeral Estadu (OJE) 2025 neebe mak promulga ona husi Prezidente Republika sei fo benefisiu ba povu, maibe benefisiu nee laos fo osan maibe oinsa mak hadia eskola no klinika sira ho kualidade.
Xefe Governu hatoo kestaun nee ba jornalista sira iha Palasiu Prezidensial, Nicolau Lobato, Bairo Pite, Dili, Kinta (05/12/2024).
Xanana dehan, nia sei lao haleu Munisipiu hotu iha Timor Leste laran tomak, nunee hodi halo observasaun ba servisu kada Ministeriu hotu lao ka lae, no lao nee ho kualidade ka lae, ida nee mak Primeiru Ministru sei halo.
“Sim benefisiu ba povu nee laos fo osan ba povu, benefisiu ba povu se ita halo eskola ida iha area rural povu hetan benefisiu, tanba nia oan sira iha neeba tenke halo rezidensia ba profesores tanba tenke iha neeba. Halo karik klinika mos benefisiu nee laos indireitu neebe halo hau mos dehan ba Prezidente, no dehan tiha ona ba Parlamentu kada tristemeste hau sei lao haleu, imi la tuir tanba fo han fali ba imi hau osan laiha,” dehan PM, Xanana.
Xefe Governu hatete, nia mos informa ba Prezidente Republika nomos Parlamentu Nasional katak, kada Trismeste sei lao haleu iha munisipiu hotu iha Timor laran tomak, hodi halo observasaun servisu neebe governu halo ba povu.
“Hau mos dehan ona ba Prezidente Republika no hau dehan tiha ona iha Parlamentu Nasional, kada trimestre hau sei lao haleu Munisipiu, tanba hau hatete governu nia programa ba iha fatin ida, Ministeriu ida neebe haree halo ona ka lae, no halo nusa, sim halo, mais halo ho kualidade, atu nunee 2026 nee prova katak saida mak imi hotu rona ona iha Parlamentu Nasional neeba,” katak nia.
Prezidente Republika, Jose Ramos Horta mos rekomenda ba iha IX Governu konstitusional atu jere Orsamentu Jeral Estadu ba tinan 2025 nee benefisia duni ba povu.
(eme)
