DILI, STLTIMORLESTE.com – Parlamentu Nasional (PN) liu husi Komisaun F neebe mak trata asuntu Saude, Seguransa Sosial no Igualdade Jeneru deteta dapur neebe mak fornese hahan la ijiene ba pasiente sira iha Hospital Nasional Guido Valadares (HNGV).
Prezidente Komisaun F iha Parlamentu Nasionál, Maria Gorumali hatete, los duni, fiskalizasaun Komisaun F ninia mai iha HNGV, haree liu ba iha diresaun neebe mak importante nomos ho konstrusaun hirak neebe mak lao hela iha neeba.
Nia dehan, iha fiskalizasaun liu-liu harabat cantrin iha HNGV nian ba iha dapur neebe mak prepara hahan.
“Sim, iha neeba ami deteta liu-liu ba fatin sira neebe mak rai hahan, liu-liu ba modo nomos ba naan sira neebe mak kompanhia prepara nee, laiha separasaun entre ikan ho naan karau nomos ayam potong ho fali naan karau, neebe mak rai tatuk malu, entaun ida nee ami deteta katak se laiha separasaun hanesan nee, bele akontese kontaminasaun entre naan ida ho naan seluk, satan naan karau rai hamutuk ho ikan, entaun nia kontaminasaun nee bele akontese,” hatete Prezidente Komisaun F, Parlamentu Nasional (PN), Maria Gorumali Barreto ba jornalista sira iha HNGV Bidau, Kinta (23/01/2025).
Nia tenik, bainhira sira tein mak hahan sira nee la rai hamutuk bele mos fo impaktu ba pasiente sira.
Iha fatin hanesan, Membru Komisaun F, Nurima Alkatiri informa, ohin Komisaun F hotu mai iha nee, hanesan programa komisaun nia ba iha tinan 2025, tanba durante nee sira rona no simu deit informasaun katak, HNGV iha problema balu neebe mak akontese iha neeba.
“Ohin ami hamutuk husi Komisaun F nuudar mos programa trabalhu Komisaun F nian ba tinan ida nee. Tanba ami mos sempre rona, simu informasaun no mos haree rasik situasaun katak iha problema balu neebe hospital hasoru. Liga ho ekipamentus, liga ho rekursu umanu, liga ho kondisaun ijiene iha hospital, tanba ida nee ohin mai laos haree buat parte hotu-hotu, maibe ita konsege haree parte balu deit,” nia tenik.
Nia koalia, iha buat balu neebe mak presiza atu haree no hadia liu-liu iha dapur neebe prepara hahan ba pasiente sira.
Nia koalia, tenke hadia para atu garante katak hahan sira neebe mak fornese ba pasiente sira nee ho kualidade laiha kontaminasaun.
Nia hatutan, hahan sira neebe mak importadu ida nee laiha problema, iha problema boot mak kualidade.
(jen)
