DILI, STLTIMORLESTE.com – Parlamentu Nasional (PN) Timor Leste (TL) prontu halo akordu ho nasaun sira seluk bainhira TL adere ba ASEAN iha fulan Outubru tinan nee.
Kestaun nee hatoo husi Prezidente Parlamentu Nasional, Maria Fernanda Lay ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kuarta (11/06/2025).
“Enkontru ho Prezidente Republika tanba momentu hau ba Roma aprezenta Sua Exelensia Prezidente ba komprimenta padre, segundu ami mos partisipa iha enkontru hau tenke fo update tanba ligadu ho ita nia adezaun ba ASEAN, por ultimu ligadu ho sesaun solene Sua Exelensia se hakarak ami mos sei prepara iha dia 15 Setembru asuntu nee mak hatoo,” dehan PPN.
Timor Leste sei tama ASEAN iha fulan Outubru oinsa preparasaun Parlamentu Nasional nia, hatan ba kestaun nee PPN hatete, preparativu Parlamentu rasik mos tenke prepara aan sai parte.
”Preparativu Parlamentu rasik mos tenke prepara aan sai parte, nomos hau hatoo katak iha dia 5 nee iha seminariu ida neebe Parlamentu Timor Leste rasik servisu hamutuk ho Parlamentu Tailandia neebe fasilita husi ICT atraveza uniaun Europeia, neebe hau hanoin formasaun nao so membru Governu tambem parlamentares presiza antes ita nia adezaun,” katak PPN.
Prezidente Parlamentu Nasional, Fernanda Lay dehan, depois de adezaun konserteza katak iha ideia tanba Sekretariu Jeral nia halo ona seminariu ida para reinforsa parlamentu sira neebe sei iha difikuldade antes tama para haree prosedimentu lei saida mak Parlamentu Nasional halo enkonjuntu enkonsultasaun.
“Antes tama para haree prosedimentu lei saida mak Parlamentu Nasional halo Enkonjuntu enkonsultasaun, sira halo Tailandia, Laos, ho nasaun vizinhu balun iha neeba neebe lingua hanesan, neebe hau mos iha ideia ida posivelmente iha futuru depois de ita nia adezaun, hau sei husu ba Sekretariu Jeral Ipa nia bele fasilita enkontru entre Parlamentu Timor Leste nia, Malazia ho Indonezia tanba ita bele koalia Bahasa para intende diak liu ita nakloke ba malu, ida nee mak iha intensaun hau hatoo ba Prezidente Republika,” katak Fernanda Lay.
Nia mos informa ba Prezidente Republika katak, depois de adezaun Timor Leste serbisu makaas nafatin nunee bele servisu hamutuk.
“Antes adezaun ita iha roteiru, klaru inklui hanesan mos Sua Exelensia Primeiru Ministru hatoo ona iha Malazia katak Parlamentu tenke prontu atu aselera prosesu sira nee, hau dehan sim parlamentu prontu liu-liu ba akordu entre nasaun ASEAN nia,” katak PPN.
Prezidente Republika Jose Ramos Horta hatete, nia hatene bainhira Primeiru Ministru Kay Rala Xanana Gusmão mai halo enkontru semanal sempre relata ba Prezidente Republika, kona-ba simeira ba ASEAN nia sei iha Outubru nomos ajenda seluk neebe PN mos sei partisipa, PR mos partisipa maibe presiza koordena malu nunee bele soke malu.
Antes nee mos Prezidente Republika Jose Ramos Horta hatete, Timor Leste tama ASEAN iha fulun Outubru, bainhira tama membru full iha Outubru sei fo vantajen boot mos ba Timor Leste.
(eme)
