DILI, STLTIMORLESTE.com – Polisia Nasional Timor Leste (PNTL) detein sidadaun estranjeiru nain 16 iha Metiaut, ba kazu Scam Call Centre ho evidénsia hanesan telemóvel no kareta.
Tuir Portavos Polísia Nasional Timor-Leste (PNTL), Superintendente Xefe Polísia João Belo dos Reis hatete, operasaun nee halao iha tuku 08:00 kalan, iha Aldeia Carungulau, Suku Metiaut, Postu Administrativu Cristo Rei. Ekipa nee kompostu husi DSIK, DSIP, PNTL no Servisu Migrasaun Timor Leste.
“Husi operasaun nee, ita asegura evidensia telemóvel kuaze 30 resin ho SIM Card Telemor neebe utiliza ba internet Starlink gratuita, inklui kareta ida, no sidadaun nain 16 neebe involve iha Kazu Call Center nee rasik,” hatete Portavos Polísia Nasional Timor Leste (PNTL), Superintendente Xefe Polísia João Belo dos Reis ba jornalista sira liu husi Konferensia Imprensa iha Komando Jeral PNTL, Kinta (27/08/2026).
Nia esplika, sidadaun estranjeiru nain 16 inklui feto ida, transporta ona ba edifísiu DSIK iha Kuartel-Jerál PNTL, Caicoli, ba prosesu identifikasaun no investigasaun.
Nia informa, tuir lei, sira sei detein durante oras 72 iha sela polísia. Hafoin interrogatóriu, autoridade sei aprezenta sira ba Tribunal atu foti desizaun.
Entretantu sidadadun sira neebe involve Kazu Scam Call Center nee iha feto nain 1 (ida) mane nain 15 (sanulu resin lima) sira nia orijen husi Xina nain 7 (hitu) Sidadaun Myanmar nain 7 (hitu) Sidadaun Vietnam nain 1 (ida) Sidadaun Suriname nain 1 (ida).
Depois halo kapturasaun, ekipa konjuntu transporta kedas suspeitu sira mai iha DSIK hodi halo prosesu identifikasaun kompletu. Depois identifikasaun, suspeitu sira asegura kedas iha sela detensaun Komando PNTL Munisípiu Dili, hodi garante sira nia detensaun no seguransa durante prosesu investigasaun.
Rejistu kazu no Prosesu Judisial nee DSIK rejista ona ho NUC 0324/26-PNSIC. Prosesu investigasaun nee sei kontinua ho dokumentu sira neebe iha.
(jen)
