DILI, STLTIMORLESTE.com – Polisia Nasional Timor Leste (PNTL) liu husi Departamentu Investigasaun Kriminal (DIK) identifika sidadaun Timoroan ida ho inisial JJPBP hodi presta deklarasaun, tanba nia partilha nia foto iha konta WhatsApp kaer hela kilat no pistola.
Nia dehan, foto nee ikus mai ema balu screenshot tiha hodi partilha fali iha media sosial (medsos) Facebook no konsege viral hodi halo parte seguransa nota no identifika JJPBP atu bele fo deklarasaun kona-ba autentiku foto neebe kaer hela pistola no kilat.
“Foto nee hau posting iha WhatsApp deit, maibe momentu neeba se iha Bali, maibe tanba ita iha kolega barak entaun ema foti foto sira nee espalha tiha iha Facebook. Hau iha faktu hanesan pasa porte, hau sai, hau nia foto barak iha neeba sai momoos loos kona-ba loron saida no oras saida,” hatete JJPBP ba jornalista sira iha Komado Jeral PNTL Kaikoli, Dili, Kinta (30/1/2025).
Nia esplika, presta tiha deklarasaun iha DIK katak, pistola ho kilat neebe nia kaer nee bainhira nia ho nia kaben ba halo kompras iha Lippo Mall iha Kuta-Bali. Iha neeba, ema barak forma atu ba haree kilat ho pistola neebe ema tau hela iha Lippo- Mall nia laran hodi bele koko no hasai foto.
“Kona-ba informasaun neebe espalha halo para atu estraga hau nia naran iha situasaun sira. Foto nee iha Bali iha Lippo Mall, foin lalais hau ho hau nia ferik oan pasa ferias iha Bali mak ami lao halimar ba Lippo -Mall hodi hola roupa. Ami nain rua lao hela haree ema forma barak, entaun hau mos gosta, maibe kilat nia modelu ema haree nee hanesan kilat tebes, mas lae. Kilat neebe hau utiliza nee laos kilat tebes, maibe kilat nee nia musan masa,” JJPBP deklara.
Nia fo sasin katak iha Lippo Mall baibain ema halo viajen ba nee ema tama selu hodi tiru halimar, tanba nee kilat masa laos kilat tebes.
Antes nee Fundasaun Mahein (FM) husu PNTL atu halo investigasaun klean ba sidadaun Timor neebe lori kilat nee.
Entretantu relasiona ho asuntu nee jornalista STL koko atu halao entervista ho PNTL, maibe seidauk bele, tanba prosesu investigasaun ba kazu refere lao hela.
(jen)