DILI, STLTIMORLESTE.com – Komando Polisia Nasional Timor Leste (PNTL) sei servisu hamutuk ho Komisaun Reguladora Arte Marsiais (KRAM), hodi hamoos simbolu Arte Marsiais no Arte Rituais neebe pinta parede sira iha sidade Dili.
“Ami sei servisu hamutuk ho KRAM hodi halo limpeza ba simbolu Arte Marsiais no Arte Ritual neebe pinta iha parede, liu-liu iha bairu sira iha kapital Dili,” hatete Komandante PNTL Munisípiu Dili, Superintendente Xefe Polisia, Orlando Gomes ba jornalista sira iha KMD, Dili, Kinta (23/01/2025).
Nia esplika, polisia sei servisu hamutuk ho KRAM nomos autoridade lokal sira inklui mos Xefe joven sira iha kada bairu, no KPK inklui OPS atu halo limpeza ba simbolu Arte Marsiais no Arte Ritual sira neebe pinta iha parede.
“KMD sei servisu hamutuk ho ita nia Konselhu Polisiamentu Komunitaria (KPK), nomos ho ita nia joven sira kada bairru limpeza letra ou simbolu Arte Marsial no Arte Ritual sira, neebe mak balu ita seidauk hamoos, ita esforsu atu hamoos hotu,” nia informa.
Nia deklara, KMD kontinua koordena ho KPK, Ofisial Polisia Suku (OPS) hodi halo limpeza ba kada bairu sira neebe sei pinta ho simbolu GAM no GAR.
Entretantu, parte PNTL, KRAM no Ministru Interior (MI), Francisco Guterres tun direita ba bairu sira iha Munisipiu Dili, akompanha husi Autoridade Seguransa PNTL no F-FDTL halo ona limpeza ba parede sira neebe nakonu ho simbolu GAM-GAR iha kapital Dili.
(jen)