DILI, STLTIMORLESTE.com – Komando Polísia Nasionál Timor-Leste (PNTL) liu husi Diresaun Polísiamentu Komunitariu halao atividade sosializasaun ba lideransa komunitariu ho komunidade no juventude sira iha Suku Madohi, Postu Administrativu Dom Aleixo, Munisipiu Dili.
“Objetivu husi ita nian sosializasaun no halo dialogu komunitariu atu promove aprosimasaun entre forsa seguransa ho lideransa komunitariu ho komunidade no juventude iha sesaun dialogu sira neebe reforsa valor toleransia sira no naun violensia nian hodi kontribui ba ambiente pasífiku iha sosiedade no ba ita nia komunidade sira,” hatete Orador husi Xefe Gabinete Igualidade Jéneru no Inkluzaun iha PNTL, Superintendente Assistente Polísia Maria Fatima Martins ba jornalista sira liu husi nia diskursu iha Sede Suku Madohi, Tersa (21/04/2026).
Nia esplika, atividade sosializasaun nee envolve lideransa komunitariu ho komunidade no juventude foka ba promove valor sira dame nian, respeitu ba direitus humanus no kombate violensia ba komunidade ho kompromisu foun ba dame no armonia sosial.
Nia deklara, aprezenta materia kona-ba prevensaun violensia bazeia ba jeneru hasoru Feto no Labarik Feto iha Timor Leste, hafoin kontinua ba orador daruak husi reprezentante husi Seksaun Krime Organizadu husi Diresaun Servisu Investigasaun Kriminál Nasionál (DISK) Inspetor Assistente Polisia Manuel Barreto aprezenta kona-ba prevensaun kazu trafiku humanu iha Timor-Leste.
Iha fatin hanesan, Diretora Diresaun Polísiamentu Komunitariu, Superintendente Polisia Helena das Dores aprezenta kona-ba seguransa cibernetika ho tipu krime iha era media sosial digital lori impaktu ba komunidade.
Iha orador dahaat mak Xefe Departamentu Protesaun Natureza no Ambiente PNTL, Superintendente Assistente Polísia Graciano Moniz Amaral aprezenta materia kona-ba Protesaun Natureza no Ambiente iha Timor-Leste.
Ikus liu orador dalima Xefe Departamentu Koordenasaun Jestaun Risku ba Formasaun no Edukasaun Sivika iha Diresaun Tranzitu Seguransa Rodaviariu Nasionál (DTSRN), superintendente Assistente Polisia Simedio Talo Mau hamutuk ho Xefe seksaun informasaun no Terenu Inspektur Polisia Arnaldo da Costa aprezenta kona-ba regra utiliza Estrada publiku evita asidente trafeku ho Mortalidade no infrasaun iha Timor-Leste tuir, dekretu lei numeru 06/2003 konaba seguransa rodaviariu nian.
Entretantu atividade sosializasaun nee hetan partisipa masimu husi joventude no komunidade sira hamutuk ho lideransa komunitariu iha Suku Madohi Bernardino de Cristo no Xefe Aldeia sira, nomos juventude sira.
(jen)
