BAUCAU, STLTIMORLESTE.com – Komando Polisia Munisipiu Baucau liu husi enkontru koordenasaun, husu Organizasaun Arte Marsial (OAM) atu mantein kria pas no estabilidade iha Munisipiu Baucau.
Komadante Komando Polisia Munisipiu Baucau, Superintendente Xefe João Sancho Pires aprezenta, enkontru refere involve husi Sub-komisaun Regulador Arte Marsial (Sub-KRAM) no responsavel OAM sira iha Baucau, atu haforsa liu tan kooperasaun entre Polisia ho OAM, tanba durante tinan rua ona situsaun iha Baucau lao hakmatek, maibe perturbasaun kiik kontinua akontese, komete husi membru OAM sira.
“Ita tenki nafatin tane Baucau nia naran, kira estabilidade lao diak liu tan, perturbasaun kiik neebe mosu entaun ami bolu sira mai atu tau hanoin hamutuk atu hadi’a nunee ba futuru labele mosu atake iha dalan,” informa Komadante Komando Polisia Munisipiu Baucau, Superintendente Xefe João Sancho Pires ba jornalista sira hafoin remata enkontru ho responsavel OAM no Sub-KRAM iha salaun enkontru Polisia Baucau, Segunda (13/07/2026).
Nia esplika, perturbasaun kiik akontese iha semana rua liu ba mosu tuda malu entre membru OAM sira, bainhira translada hela mate isin ida nuudar membru OAM husi Dili atu ba Suku Gariuai mak hetan atake malu iha area Bolata, Suku Buibau, Postu Administrativu Baucau Vila.
Nia sublina, Komando Polisia nia evaluasaun ba situasaun nee la dun diak, tanba nee konvoka enkontru ho Sub-KRAM no responsavel OAM sira iha Baucau foti mekanizmu ba problema refere.
“Ita bolu koordenador hamutuk ho Sub-KRAM mai hamutuk foti mekanismu ruma atu ba oin labele sai inimigu ba malu, mate nee mate ona, maibe ita tenki unidu nafatin,” João Sancho Pires akresenta.
Iha fatin hanesan Prezidente Sub-KRAM Baucau, Padre Justino de Sousa SDB hateten, inisiativa neebe Komando Polisia Munisipiu Baucau esforsu, nuudar parte konsiderasaun ba OAM sira, tanba nee husu membru KRAM atu kontribui hanoin hodi evita destabilidade iha Baucau.
“Hau louva ho lider Arte Marsial tanba hatudu sira nia responsabilidade. Tanba nee hau konkorda husi evaluasaun ida nee ita hadia ita nia rai doben Baucau,” katak Padre Justino de Sousa.
Enkuantu Koordenador OAM Persaudaraan Setia Hati Terare (PSHT) Baucau, Alfredo Ximenes louva ho servisu seguransa iha Munisipiu Baucau, tanba koopera diak ho OAM, nunee sei evita destabilidade iha Baucau, maibe perturbasaun neebe sei akontese, tanba iha provokasaun husi parte seluk.
“Joven hotu sempre hakarak akompanha nia maluk balu mate, maibe dala ruma maluk balu la komprende entaun mosu perturbasaun, maibe presiza fo hanoin ba lider sira atu atua labele mosu tan iha futuru,” Alfredo argumenta.
Entretantu, Sub-KRAM Baukau rejista OAM hamutuk neen (6) mak eziste iha Munisipiu Baucau, mak hanesan, PSHT, IKS, KORK, THS-THM, Perisai Diri (PD), Padjajaran no Seruling Dewata.
(tom)
