BAUKAU, STLTIMORLESTE.com – Komando Polisia Munisipiu Baukau suspeta ona ema nain 3 ba Francisco Jose Boavida nia mate iha Aldeia Aubaka, Suku Triloka, Postu Administrativu Baukau Vila.
Komadante Interinu Komando Polisia Munisipiu Baukau, Superintendente Joao Sancho Pires esplika, vitima Francisco Jose Boavida, idade 25, husi Suku Ostico, Postu Administrativu Vemasi, neebe iha relasaun domin ho parseira ODC, idade 21, nunee iha loron 08 Fevereiru tinan nee, vitima Francisco hasoru malu ho nia namorada iha Aubaka Triloka neebe mate ho tali, tanba dehan tara aan.
Nunee Komando Polisia Munisipiu Baukau liu husi Eskuadra Postu Baukau Vila too kedas fatin akontesimentu hodi evakua vitima ba Hospital Rejional Eduardo Ximenes (HoREX) Baukau, neebe iha loron 09 Fevereiru nee kontinua kedas transporta ba Hospital Nasional Guido Valadares (HNGV) Dili hodi halo autopsia.
“Ita suspeta hela ema nain 3, ita hasae ona ba prokurador husu mandadu no hein rezultadu autopsia mai, ita entrega ba Ministeiru Publiku. Primeiru informasaun mai dehan tara aan, maibe ita identifika indikasaun kakorok la hanesan tara aan,” hateten Superintendente João Sancho Pires ba jornalista sira iha knaar fatin Vila Nova, Tersa (11/02/2025)
Komadante nee sublina, bainhira Komando Polisia Munisipiu Baukau liu husi Polisia Eskuadra Postu Baukau Vila too fatin akontesimentu halo identifikasaun ba vitima nia isin neebe polisia nota ho indisiu forte katak, vitima mate ema mak oho.
Nunee Komando Polisia Baukau daudaun suspeta ona ema nain 3 orijen Suku Triloka neebe iha relasaun familia ho ODC neebe nuudar vitima nia namorada.
Kazu refere Komando Polisia Munisipiu Baukau liu husi Seksaun Investigasaun Kriminal rejistu ona ho numeru Nuc 16/SIK//PNTL hodi kontinua prosesu, tanba parte familia vitima koopera submete ona mate isin ba autopsia.
“Ema nain 3 nee familia husi feto nee, tanba nee mak ami dehan prosesu investigasaun hein rezultadu autopsia nee mai ita hasae ba prokurador haree asuntu nee, iha ona mandadu ruma ita sei lao tuir,” João Sancho Pires akresenta
Entretantu inisial sidadaun nain 3 neebe Komando Polisia Munisipiu Baukau suspeta ba Francisco Jose Boavida nian mate, Komando Polisia Baukau la fo sai ba publiku, tanba sei iha prosesu laran.
(EST 2)
