DILI, STLTIMORLESTE.com – Polísia detein ona suspeitu ida ne’ebé sona profesóra Martinha Leu Mali iha Atabae, Bobonaro, no agora submete hela ba prosesu investigasaun.
Superintendente Edukasaun Munisípiu Bobonaro, Noémia da Silva Manuel Leite, informa katak insidente ne’e akontese iha tuku 03.00 madrugada, iha rezidénsia vítima nian, iha Suku Hataz, Postu Administrativu Atabae.
Nia esplika katak, hafoin akontesimentu, suspeitu halai husi fatin, maibé PNTL konsege kaptura nia iha dalan, bainhira nia prepara atu viaja ba Maliana.
Kapturasaun ne’e realiza husi Seksaun Task Force Komandu Polísia Munisípiu Bobonaro, hafoin simu informasaun husi Polísia Esquadra Atabae.
“Ohin dader, suspeitu sae ona mikrolete atu viaja ba Maliana. Maibé Task Force konsege kaptura nia iha dalan no entrega fali ba Esquadra Atabae,” Noémia hateten ba Jornálista liu husi via telfone, sexta-feira (06/11/2026),
Tuir kronolojia akontesimentu, suspeitu no vítima partisipa iha festa ida iha Atabae, kalan antes insidente akontese.
Noémia relata katak suspeitu hatene vítima hela mesak iha rezidénsia, besik fatin ne’ebé hala’o festa.
Iha tuku 03.00 madrugada, suspeitu koko loke odamatan uma vítima nian. Vítima rona lian no loke odamatan, maibé haree suspeitu sobu hela odamatan.
“Hafoin diskute malu, suspeitu lori teijora sona vítima iha kotuk. Vítima sente manas no bainhira kaer kotuk, mak foin haree ran,” nia esplika.
Hafoin hetan kanek, vítima hakilar no komunidade mai fó tulun, antes lori nia ba Klínika Adabaleten atu hetan tratamentu médiku.
Noémia hatutan katak, hafoin tratamentu, Polísia Esquadra Atabae lori vítima ba eskuadra atu rejista nia informasaun kona-ba insidente ne’e.
Atualmente, vítima hela hamutuk ho koordenadór EBF Aidabaslala, fatin ne’ebé nia hanorin estudante sira iha klase 6.
Superintendente ne’e hateten katak, vítima manifesta trauma no husu atu halo kolokasaun fali ba nia aldeia, tanba sente la seguru atu kontinua hela iha área ne’e.
“Vítima rasik ko’alia ho ha’u katak nia trauma no husu atu halo kolokasaun fali ba nia aldeia. Maibé desizaun ne’e depende ba diresaun,” Noémia dehan.
Iha parte seluk, Ministra Edukasaun, Dulce de Jesus Soares, informa katak Inspesaun Jerál hamutuk ho inspetór eskola sira hala’o hela investigasaun atu klarifika kazu ne’e.
“Dadaun ne’e, parte Inspesaun Jerál hamutuk ho inspetór eskola sira hala’o hela investigasaun kona-ba kazu ne’e,” ministra ne’e afirma.
Dulce hato’o tristeza boot tanba insidente violénsia ne’ebé atinje profesóra ida, liuliu profesór sira ne’ebé mai husi munisípiu seluk atu fó apoiu edukasionál iha área remota.
Nia apela ba komunidade atu koopera no proteje profesór sira, hodi garante katak sira bele hala’o knaar edukasionál iha ambiente seguru no favorável.
Ministra ne’e mós subliña katak profesór sira iha responsabilidade importante atu eduka labarik no prepara jerasaun foun atu sai sidadaun di’ak iha futuru.
Entretantu, to’o agora seidauk iha informasaun kona-ba motivu ne’ebé lori suspeitu atu komete asaun violénsia ne’e.
Komunidade iha área ne’e husu ba autoridade kompetente atu hametin seguransa, liuliu ba profesór sira ne’ebé hela no hala’o knaar iha área eskola nian.
(alb)
