BAUKAU, STLTIMORLESTE.com – Ponte Gomilafa iha Suku Atelari, Postu Administrativu Laga, difikulta kompanhia Norinco International Cooperation hodi mobiliza ekipamentus pezadu no seluk tan ba Postu Baguia.
Administrador Postu Baguia, Mario Xavier da Silva esplika, kondisaun ponte Gofilafa daudaun nafatin eziste hanesan uluk hodi fasilita movimentu transporte husi Baguia ba Baukau Vila, maibe kondisaun hahu aat ona, tanba iha parte balun hahu nakfera no besi sira estabelese iha ninin kuaze monu ona, maibe nafatin utiliza, tanba laiha dala alternativu.
Aleinde nee fo impaktu ba movimentu kareta fuzu husi kompanhia Norinco, tanba medida kloot susar mobiliza ekipamentus pezadu no seluk tan husi Laga ba Baguia.
“Agora kareta tronton boot sira nee lori ekipamentus pezadu boot sira atu liu araska, tanba medida kloot, entaun tuir kompanhia sira nia hakarak nee atu halo loos para kareta tronton sira bele liu, maibe fatin nee lulik,” hateten Mario Xavier da Silva ba STL iha Terloidae Laga, Kuarta (11/06/2025).
Nia sublina, kondisaun ponte refere fo impaktu ba projetu reabilitasaun estrada kontinuasaun husi Laga ba Baguia, tanba kompanhia labele mobiliza ekipamentus sira ho kapasidade boot hodi aselera projetu reabilita estrada refere.
Nia fundamenta, mezmu kondisaun ponte nunee, maibe parte kompanhia ho vontade kontinua servisu liu husi intervasaun mobiliza ekipamentus ho kareta kiik daudaun alargamentu ba estrada too ona area Postu Baguia.
Project Manager Kompanhia Norinco, Song Long hateten, ponte Gomilafa parte difikulta mobilizasaun ekipamentus pezadu, tanba medida kloot no kompanhia iha inisiativa atu halo manutensaun hodi fasilita servisu, maibe komunidade sira la koopera.
“Ponte nee kompanhia koko atu hadia, maibe komunidade sira iha neeba dehan, nee fatin lulik labele book. Ponte nee kloot, ami hakarak book halo luan ema liu kontente,” hateten Song.
Project Manager nee hateten, konstrusaun no reabilita ponte sira la inklina iha dezenhu reabilitasaun estrada Laga-Baguia, maibe haree kondisaun ponte Gomilafa medida kloot no difikuldade movimentu transporte, nunee kompanhia hakarak halo manutensuan aleine fasilita servisu fo mos vantajem ba movimentu transporte Baguia-Baukau, maibe difisil implementa, tanba fatin refere lulik.
Ba preokupasaun ponte refere, Song hateten, dala barak ona parte kompanhia halo ona aprosimasaun ho Autoridade Suku no Autoridade Postu Laga, maibe laiha solusaun.
Liga asuntu nee STL tenta komfirma Administrador Postu Administrativu Laga iha nia knaar fatin, maibe la konsege hetan komfirmasaun, tanba Administrador okupadu ho servisu avalisaun kondisaun ezistentes husi Diresaun Nasional Promosaun Efisiensia Administrasaun Lokal (DNPEAL).
(tom)
