BAUCAU, STLTIMORLESTE.com – Jogu kopa mundial neebe kompete husi ekipa futebol Portugal no Kroasia iha loron 03 Julhu 2026, tuku 08:00 dader OTL, familia ida iha Bercoli, Suku Uma Ana Iko, Postu Administrativu Venilale, Munisipiu Baucau, hetan dezastre, tanba uma mutuk no oan mane ida hetan kanek.
Komadante Operasaun Autoridade Protesaun Sivil (APC – sigla português) Munisipiu Baucau, Francisco Viana Freitas haktuir, dezastre nee akontese ba familia ida iha Bercoli Venilale, tanba iha loron 03 Julhu parte dader bainhira jogu Portugal Vs Kroasia hahu, Xefe familia husi familia nee ba halao servisu iha liur hanesan kundutor no husik hela oan no feen kaben iha uma, maibe jogu nee hahu feen kaben husik hela oan mane idade 03 toba mesak iha uma nia parte ba asiste jogu futebol nee liu husi televizaun iha vizinhu nia uma.
Durante nia asiste jogu refere liu husi televizaun iha vizinhu nia uma, uma neebe pertense ba sira ho oan mane idade 03 neebe sei toba dukur iha laran afeta husi insendiu rezulta uma mutuk total no labarik idade 03 sofre kanek.
“Ba too iha terenu husu duni informasaun ahi nee alastra husi neebe nain rasik la hatene, tanba ohin joga uma nain ba tiha nonton bola entre Portugal ho Kroasia iha vizinhu sira, entaun ahi han sira la hatene. Insendiu nee alin kiik oan foin tinan 03 mos hetan kanek tanba toba hela uma laran, sorte vizinhu sira halai ba kous sai,” haktuir Francisco Viana Freitas ba jornalista sira iha nia knaar fatin Tirilolo Baucau, Sesta (03/07/2026).
Nia esplika, hafoin insendiu nee akontese parte APC simu kontaktu liu husi telefonika husi komunidade sira nunee ho ekipa korpu bombeiru too kedas fatin, maibe bainhira APC too uma ida neebe labarik mane idade 03 toba ba hetan salva husi komunidade kauza mutuk total inklui ho sasan sira uma laran nian no dokumentus importante sira ho osan balu la konsege salva. Maibe iha insendiu nee APC hamutuk ho ekipa korpu bombeiru konsege salva uma ida neebe mos afeta insediu.
Nia aprezenta, labarik mane idade 03 neebe hetan kanek no salva husi komunidade vizinhu ida nee transporta kedas ba Sentru Saude Venilale atu hetan tratamentu mediku iha neeba, maibe la konsege no transfere hikas ba Hospital Rejional Eduardo Ximenes (HoREX) Baucau, tanba kondisaun kanek grave.
“Alin kanek nee ita nia ekipa ba tuir Sentru Saude maibe sira dehan ba tiha ona hospital, tanba nia kondisaun grave oituan,” Francisco konta.
Entretantu, insendiu nee parte APC terrenu rekolha informasaun husi uma nain iha fatin insendiu, uma nain rasik la hatene kauza ba insendiu refere, maibe parte APC deskonfia insendiu refere mai husi sirkuitu instalasaun fiu eletresidade, tanba komunidade sira toman ona lakohi hamate ahi husi instalasaun fiu eletrisidade no APC kumpri ona nia dever fo ona apoiu emerjensia ba vitima insediu nee.
(tom)
