DILI, STLTIMORLESTE.com – Sirkulasaun poster kandidatu Prezidente RDTL 2027-2032 ho títulu “Se los mak sei kandidata an loloos ba PR RDTL 2027-2032” ne’ebé hatudu figura lider nasionál nain 6 viral ka sirkula iha mídia sosiál hetan atensaun públiku.
Poster ne’e hatudu figura hanesan Lere Anan Timur, Rui Maria de Araujo, Filomeno Paixão, Francisco Mau-Kura, Joaquim Fonseca no Bendito Freitas ho fundu bandeira RDTL.
Relasiona ho asuntu ne’e, Observadór Polítika, Romaldo da Costa, hatete maske poster sirkula maka’as, seidauk iha deklarasaun ofisiál husi figura sira.
“Ema hotu iha direitu kandidata-an tuir Konstituisaun, maibé desizaun ikus iha povu nia liman liu husi votu demokratiku,” dehan Romaldo ba STL, iha Kaikoli, Dili, Tersa nee (0209/2026).
Tuir nia, figura sira maioria nu’udar lider istóriku rezisténsia ho esperiénsia boot, iha lideransa estadu no militár.
Nia husu ba públiku atu kritiku ba informasaun iha mídia sosiál, no hein prosesu ofisiál husi STAE no Tribunál bainhira periodu kandidatura loke.
Iha fatin ketak Akademista UNPAZ, Martinho de Araujo husu ba públiku atu labele fiar lalais poster ne’ebé sirkula, maibé haree ba programa no vizaun kandidatu nian.
“Ita presiza matenek hodi analiza figura kandidatu nian, la’os haree de’it ba naran boot, maibé haree ba sira nia kompromisu atu defende interese nasionál,” tenik nia.
Nunee mos antes ne’e Jenerál Reformadu Lere Anan Timur, deklara nia iha mehi atu kandidata-aan ba Prezidente Repúblika iha 2027 liu husi Partidu FRETILIN, maibé karik partidu la fó konfiansa nia sei avansa ho independente.
Tuir Lere, uluk nia iha kompromisu rua mak liberta funu no liberta povu, no funu hotu ona, maibé povu seidauk moris di’ak, tanba ne’e hakarak kandidata-aan hodi hasai povu husi kiak no mukit.
Nia esplika, FRETILIN mak nia partidu, tanba ne’e prefere avansa husi partidu, maibé se lideransa la tau konfiansa, nia nafatin avansa ho dalan independente.
Enkuantu poster refere sai virál no fahe tutan iha plataforma mídia sosiál oin-oin hanesan Facebook, TikTok no Instagram, hodi hamosu reasaun oin-oin husi públiku, balun fó apoiu no balun konsidera hanesan tentativa hodi sukat sentimentu eleitorál molok periodu kandidatura ofisiál hahú.
(car)
