GLENO, STLTIMORLESTE.com – Ho kondisaun estrada iha Munisipiu Ermera nian, halo populasaun lamenta tebes duni, maibe prosesu konstrusaun estrada iha Ermera aleinde estrada urbana, iha mos kontrusaun estrada Munisipal Gleno nian agora lao hela.
Tuir Prezidente Autoridade Munisípiu Ermera, José Martinho dos Santos Soares katak, kondisaun estrada sira iha Munisipiu Ermera nian halo populasaun sira lamenta duni, liu-liu iha tempu udan, maibe agora tama bailoron nee diak oituan ona.
Nia haktuir, prosesu konstrusaun estrada iha Ermera aleinde estrada urbana, iha mos kontrusaun estrada Munisipal Gleno nian neebe agora lao hela ona.
“Ami hein katak buat sira nee hotu laos diak no bele finaliza iha tempu badak, atu nunee povu bele ho kontente utiiza estrada nee. Liu-liu iha kapital Gleno, hanesan Kapital Munisipiu Ermera, neebe durante nee povu hein hela,” dehan nia ba jornalista sira iha Gleno, Kinta (02/07/2026).
Nia forma, atinzimentu neebe mak agora daudaun iha nee signifikadu tebes, estrada iha Gleno laran hamutuk kilometru 8.
Tuir nia, lansamentu ba estrada nee iha rua, ida lansamentu estrada diresaun husi Gleno-Letefoho no aumezmu tempu mos lansamentu iha Gleno laran, prosesu sira nee lao hotu ona
.
“Iha Gleno-Letefoho nian sira komesa halo ona fase sira nia kamp depois, komforme husi hau koalia ho kompania, sira dehan Julu, Agostu nee sira atu bok hotu kedas, sira hein rai maran oituan lai mak sira halo,” dehan nia.
Neebe hein deit bainhira mak sira finaliza, tanba bainhira ema kaer ona iha terenu nee fiar katak buat hotu lao ona. Hein deit bainhira finaliza neebe se lori tinan ida resin ou iha tinan 2028 nee sira bele finaliza ona.
Nia hatutan, bainhira prosesu konstrusaun nee lao, indimizasaun ba populasaun sira nia ai oan no aihoris, sira halo hotu ona.
Xefe Suku Baboi Kraik, Postu Administrativu Atsabe, Luis Fernandes hatete, problema baziku neebe povu sira infrenta liu mak kondisaun estrada, halo komunidade sira labele lori sira nia produtu mai faan iha merkadu tanba kondisaun dalan.
Aleinde nee tanba kondisaun estrada nomos mina folin neebe daudaun sae, halo bis sira mos hasae tarifa.
“Hau husi Atsabe mai sae bis too Gleno selu kedas US$ 7. Neebe hau hanoin povu kiik sira neebe laiha osan atu selu kareta nee, sira kala labele lori duni sira nia produtu mai faan iha merkadu hodi hetan netik osan ruma bá sira nia presiza,” dehan nia.
Nia parte rekomenda bá governu atu tau matan no hadia dalan husi Diresaun Letefoho too Atsabe. Nunee mos bele hatun folin mina iha rai laran, atu nunee komunidade sira bele lori sira nia sasan bá faan iha merkadu. Tanba povu kiik sira hetan osan husi sira aihan hirak neebe lori bá faan iha merkadu.
(dom)
