AMBENO, STLTIMORLESTE.com – Tinan nee povu Kutete falha kolheta ai-haan, tanba pesti mak estraga ai-haan inklui udan been makaas liu, tanba nee husu ba governu atu kria projetu Cash For Work ka projetu rural neebe involve povu halo servisu no hetan ai-haan ou osan.
Kestaun nee levanta husi Xefe Suku Kutete, Jose Antonio Bana ba STL iha Aldeia Kutete, Suku Kutete, Postu Administrativu Panteakassar, Rejiaun Administrativa Espesial Oecusse-Ambeno (RAEOA), Kuarta (08/07/2026).
“Ita nia povu iha Suku Kutete, tinan nee failha kolheta ai-haan tanba pesti gafanutu mak estraga ai-haan molok ai-haan isin, tanba nee husu ba governu liu husi Diresaun Rejional Agrikultura atu prepara aimoruk ruma ba povu hodi hasoru pesti ida nee, iha tempu ai-haan isin. Aleinde nee, tinan nee mos udan been makaas, entaun iha parte foho nomos tasi ibun, povu labele kolheta sira nia ai-haan ho diak, tanba udan mos la fo fatin ba ai-haan hodi isin, tanba nee husu Governu Autoridade RAEOA atu kria Cash For Work ka projetu kiik iha area remotas hodi hadia dalan ou bee dalan atu nunee povu servisu no hetan osan ou Amai-haan atu sustenta sira nia nesesidade moris,” dehan nia.
Iha oportunidade hanesan Jose Eli nuudar lia nain suku Kutete mos rekonhese katak, tinan nee rezultadu kolheta aihan iha Area foho nomos tasi ibun, maioria failha kolheta, tanba nee husu ba governu karik bele kria projetu ruma iha bairru no suku atu nunee povu serbisu no hetan osan ou aihan atu sustenta sira nia moris loron-loron nian.
“Hau hanesan lia nain Suku Kutete, rekomenda ba governu Autoridade RAEOA, atu tau matan ba ami povu kiik iha area remotas, tanba dadaun projetu balun tama iha suku laran, hanesan projetu Programa Nasional Dezenvolvimentu Suku (PNDS) ho obra balu halo postu Saude iha Suku Kutete maibe ida nee ba sira neebe iha skill ou badaen, maibe povu kiik labele halo serbisu iha projetu governu nian, neebe husu governu atu kria programa ruma iha suku laran, atu nunee povu bele serbisu no hetan osan ou hahan,” dehan Jose Eli.
Iha biban nee, Maria Elu nuudar komunidade Kutete mos rekomenda ba governu atu kria programa ruma iha suku laran, atu nunee sira bele hatan serbisu hanesan uluk, projetu cash for work, atu nunee povu serbisu no hetan fos hodi konsumu.
(jos)
