DILI, STLTIMORLESTE.com – Hahalok hamaus laran iha tempu kampanha, sobu hela fatin iha ukun sai sasin neebe tanis ba povu kbiit laek sira katak, sira nia votu uza deit hanesan eskada sosial ba elite politika sira. Tanba bainhira kadeira poder ka ukun nian metin ona iha palasiu luxu, “Eskada” neebe foti sira hahu haluhan tiha ona, no hakoak neebe uluk hatudu iha baze, agora troka fali ho orden husi makina destrusaun neebe laran metan hodi duni povu iha nia rai rasik.
Iha tempu kampanha eleitoral, povu kategoria hanesan eroi no nain ba demokrasia. Ukun nain ka elite politika sira prontu sae foho no tun tasi hakoak katuas- ferik sira ho matan been, no promete katak povu nia moris sei sai prioridade boot liu. Maibe realidade hatudu katak povu uza deit hanesan ain hakat hodi sira bele sae ba palasiu.
Bainhira sira tur ona iha leten, povu neebe uluk hili ka foti sira, agora kategoria fali hanesan impedementu ba dezenvolvimentu. Ho razaun modernizasaun no interese nasional Governu hahu movimentu gusur, neebe duni sai sidadaun sira husi sira nia rai moris fatin laho solusaun neebe dignu.
“Uluk ami mak sira nia eskada hodi sae ba leten.Agora sira iha leten ona, sira lori makina eskavator hodi dudu sai no soe fali ami hanesan sasan neebe la iha ona folin,”dehan sidadaun Antonio de Oliveira, neebe ninia hela fatin rahun ona hanesan rai rahun iha fulan hirak liu ba, ba STL, Kuarta (06/05/2026).
Ho lian triste nia dehan, Governu nee laran fatuk ona ba sira nia terus.”Sira haree deit luxu sidade nian, maibe sira taka matan ba ami nia tanis, depois mak ita hanorin malu iha tinan 2028,”dehan nia.
Iha parte ketak Akademista UNPAZ, Orlando de Jesus kestiona etika dezenvolvimentu ida neebe haterus fali ninia povu rasik.
“Se dezenvolvimentu nee lori deit ksolok ou kontente ba elite sira maibe duni sai povu ba liur, nee laos progresu, maibe traisaun ba kontratu sosial neebe halao iha tempu kampanha,” hatete Akademista nee.
Akademista nee afirma, Estadu laos kompanhia neebe foka deit ba imajen sidade nian, maibe Estadu iha obrigasaun moral atu proteje povu neebe fo ona mandatu ba sira.
(car)
