DILI, STLTIMORLESTE.com – Prezidensia Republika (PR) liu husi Unidade Servisu Sosiedade Sivíl no Asuntu Sosial, halo konstrusaun uma foun ba maun-alin oan-kiak nain 4 iha Munisípiu Bobonaro.
Prezidensia Republika liu husi Unidade Servisu Sosiedade Sivíl no Asuntu Sosial, hahu halo konstrusaun uma foun ba maun-alin oan-kiak nain 4 iha Aldeia Lourba, Munisípiu Bobonaro. Benefisiariu sira Faustinho, Francisca, Juvito no Martinho Godinho da Costa lakon sira nia aman Alipi Godinho iha tinan 2017, no inan Felicidade D. Guterres iha tinan 2022.
Tuir komunikadu neebe STL asesu husi media PR Kuarta (11/06/2025) hatete, serimonia lansamentu fatuk dahuluk nee hetan partisipasaun husi Administrador Postu Administrativu Bobonaro, Thomas Barreto Henriques no Xefe aldeia Lourba, Lino da Cruz, nuudar autor neebe propoin inisiativa nee ba Prezidente Ramos Horta.
Tuir Teresa dos Santos Ximenes, Koordenadora husi Unidade Servisu Sosiedade Sivil no Asuntu Sosial, uma ho medida metru 8×7 nee sei inklui fasilidade esensial sira hanesan kuartu, haris-fatin no dapur. Prevee ona obra nee sei remata iha fulan tolu nia laran.
Planu abitasaun nee parte ida husi inisiativa Prezidente Ramos Horta nian atu apoia família vulneravel sira iha Timor laran tomak. Xefe Aldeia Lino da Cruz elojia kompromisu husi Prezidente no destaka kondisaun difisil neebe labarik sira hasoru wainhira sira lakon inan-aman.
Maun-alin nain 4 nee hatoo sira nia agradesimentu ba abitasaun foun, no autoridade lokal sira kompromete atu identifika família sira seluk neebe iha situasaun hanesan neebe bele hetan benefisiu husi apoiu iha futuru.
Prezidente Republika Jose Ramos Horta hatete, Prezidensial Republika kontinua tulun povu kbiit laek neebe mak laiha duni kbiit, orsamentu neebe mak apoiu husi Prezidensial Republika, osan Prezidente nia.
Prezidente Republika hatete, Ekipa Prezidensial Republika kada loron sempre lao buka fo apoiu ba komunidade neebe kbiit natoon, hodi halo kontrusaun uma inklui mos loke kios ba sira nunee bele sira sustante aan, tanba bainhira entrega osan deit too fulan rua no fulan tolu osan sei hotu, tanba nee ekipa buka apoiu komunidade neebe moris kiak hela iha uma ladiak balun hela iha fatuk koak buka halo netin uma hodi tahan netik loron no anin no balun loke kios nunee bele sustante aan iha tempu naruk.
(eme)
