DILI, STLTIMORLESTE.com – Prezidente Republika (PR), Jose Ramos Horta hatoo apresia ba Estadu Unidos Amerika nia apoiu ba Timor Leste (TL) nia integrasaun ba ASEAN.
“Selebrasaun nee akontese iha momentu istoriku ida ba Timor-Leste, bainhira ami asume ami-nia fatin nuudar Estadu-Membru ASEAN ba dala-11. Ami apresia Estadus Unidus nia apoiu kontínuu ba Timor-Leste nia integrasaun ba ASEAN no hein atu servisu makaas liutan hodi promove rejiaun Indo-Pasífiku neebe pasífika, estavel no prospera,” dehan Prezidente Republika liu husi diskursu iha Embaixada Amerika TL, Kuarta kalan (01/07/2026).
Prezidente Republika hatete nuudar nasaun kiik ho vizaun global, Timor-Leste fiar katak dialogu, kooperasaun, respeitu ba malu no kumpre ba lei internasional sai nafatin aliserse solidu liu ba pas no estabilidade.
“Nuudar nasaun neebe moris liu hosi dialogu, rekonsiliasaun no solidariedade internasional, ami sei nafatin fo apoiu ba esforsu hotu-hotu neebe ho objetivu atu hamenus tensaun no kria espasu ba diplomasia. Ho espíritu ida-nee, ami simu esforsu diplomatiku sira foin lalais nee, inklui sira neebe halao ona entre Estadus Unidus no Republika Islamika Iraun nian, neebe buka atu hamenus tensaun sira no promove dialogu konstrutivu. Dialogu nunka sai sinal frakeza nian; ida-nee maka fundamentu neebe harii dame neebe dura ba tempu naruk,” dehan PR Horta.
Xefe Estadu hatete, EUA selebra tinan 250 independensia Timor mos selebra parseria neebe dura ba tempu naruk entre povu sira parseria ida neebe kontinua hametin aan liu husi edukasaun, inovasaun, investimentu no interkambiu entre sidadaun sira.
“Hamutuk, ita sei kontinua harii relasaun ida neebe sei kontribui laos deit ba prosperidade ita-nia país rua nian, maibe mos ba pas, ba estabilidade no ba kooperasaun iha ita-nia rejiaun no mundu. Hau konklui hodi renova hau-nia felisitasaun sinsera ba Governu no ba povu Estadus Unidus Amerika nian iha aniversariu istoriku ida-nee. Atu amizade entre Timor-Leste ho Estadus Unidus bele buras nafatin iha tinan barak nia laran,” hakotu.
(eme)
