DILI, STLTIMORLESTE.com – Prezidente Republika (PR) Jose Ramos Horta hatete, tuir nia haree feto barak hatudu sira nia kualidade iha lideransa ho matenek iha Parlamentu Nasional.
Prezidente Republika Jose Ramos Horta hatoo lia hirak nee ba jornalista sira iha kantina Matak Palasiu Prezidensial Nicolao Lobato, Bairo Pite, Tersa (11/02/2025).
PR hatete, feto mak lidera iha mudansa, tanba feto barak hatudu husi kualidade no lideransa.
“Iha feto barak neebe hatudu sira nia kualidade lideransa, hatudu sira nia matenek iha Parlamentu Nasional, iha Governu, feto sira iha Governu nee kuaze sira hotu-hotu servisu diak. Dala ruma la konsege halo buat boot, tanba labele Ministru deit, asesor sira, Visi Ministru sira, hotu-hotu nee tenke tane Ministru nee, tenke servisu diak,” dehan PR Horta.
Prezidente Republika dehan, problema bainhira iha Governu koligasaun, se Ministru partidu ida, Visi Ministru partidu seluk, Sekretariu Estadu partidu seluk, depois asesor sira balu partidu seluk, ida nee sira rasik mak atrapalha fali.
“Maibe purtantu feto sira hau haree servisu diak ba Governu, Primeiru Ministru halo karik remodelasaun podia hatama tan feto balu tan ba Ministru, Visi Ministru, Sekretariu Estadu, ba Prezidente Autoridade Munisípiu tau feto sira,” katak PR Horta.
Iha biban nee, Prezidente Republika hatete, bainhira feto mak lidera sei halo mudansa buat barak, maibe ohin loron feto nia partisipasaun la sufisiente.
“Feto sai lideransa iha mudansa, maibe la sufisiente, hau haree iha esperiensia Embaixador sira hau tenta tau feto. Iha Prezidensia Republika feto nain tolu pozitivu, tolu iha Prezidensia Republika nee feto, nee duni Primeiru Ministru hau hatene, nia sensivel tebes-tebes hakarak, mas problema depende ba partidu, partidu mak halo lobi makaas nunee tau sira nia ema,” katak PR Horta.
Prezidente Republika dehan, partidu neebe mane mak domina, klaru sira tau mak mane kandidatu ba Governu normal.
Tuir Prezidente katak, feto iha kapasidade neebe makaas no feto barak mos oras nee asumi kargu iha fatin importante sira, hanesan mos Prezidente Autoridade Munisipiu Baukau no seluk tan neebe hatudu sira nia matenek iha lideransa.
(eme)
