DILI, STLTIMORLESTE.com – Prezidente Republika (PR), Jose Ramos Horta fo pose ba Antonio da Conceição “Kalohan” asumi kargu nuudar Embaixador Estraordinariu no Plenipotensiadu Dezignadu ba Suisa.
Prezidente Republika, Jose Ramos Horta fo pose ba Antonio da Conceição asumi kargu nuudar Embaixador Estraordinariu no plenipotensiadu dezignadu ba Suisa, iha Palasiu Prezidensial, Nicolau Lobato, Bairo Pite, Dili, Kuarta (12/02/2025).
Bainhira remata simu pose, Sekretariu Jeral Ministeriu Negosiu Estranjeiru, João Freitas de Camara ba jornalista sira hatete, ohin marka pasu importante ida, tanba Prezidente Republika fo pose ba Antonio da Conceição hodi asumi kargu nuudar Embaixador Estraordinariu no plenipotensiadu dezignadu ba Suisa, neebe rezidente iha Zenebra.
“Ita nia Embaixador sesante fila ona mai Timor Leste, agora ita nia embaixador foun ba fali para hodi labele husik embaixada iha neeba mamuk, senhor Embaixador Antonio da Conceição laos deit sai embaixador bilateral, katak ba nasaun Suisa no ba mos Nasoens Unidas,” katak nia.
Nia hatete, Embaixador asumi funsaun rua neebe ho responsabilidade boot hodi reprezenta nasaun iha rai liur.
“Ita nia esperansa ba embaixador reprezenta Timor atu bele halo servisu iha neeba ho susesu,” katak nia.
Embaixador Antonio da Conceição nia mandate nuudar Embaixador nia mandate normal durante tinan 3.
Iha juramentu Embaixador Estraordinariu no plenipotensiadu dezignadu ba Suisa, Antonio da Conceição jura ba Maromak no ba povu katak ho ondra sei halao knaar kumpri lealdade iha funsaun hodi halao knaar tuir konstituisaun Republika Demokratika Timor Leste.
(eme)
