DILI, STLTIMORLESTE.com – Prezidente Repúblika (PR), José Ramos-Horta halo despedida ho Embaixadora Austrália ba Timor Leste Caitlin Wilson tanba remata ona Mandatu iha Timor Leste.
Enkontru despedida ne’e hala’o iha Palásiu Prezidensiál Nicolau Lobato, Bairro Pite, Sesta 28/10/2026 atu marka remata Embaixadora Caitlin Wilson nia misaun diplomátika iha Timor-Leste.
Depois enkontru, Embaixadora Caitlin Wilson hateten katak nia sente honra boot tanba hetan konvite husi Prezidente Repúblika atu hala’o enkontru despedida.
Nia esplika katak, enkontru ne’e diskute kona-ba rezultadu servisu, kooperasaun no relasaun bilateral entre Austrália ho Timor-Leste durante nia mandatu.
“Relasaun entre nasaun rua kontinua dezenvolve, liuliu iha kooperasaun entre povu no governu,” dehan Embaixadora Caitlin Wilson.
Nia hateten katak, vizita Primeiru-Ministru Austrália, Anthony Albanese, ba Timor-Leste no asinatura akordu foun hatudu kontinuidade kooperasaun bilateral.
Austrália kontinua sai parseiru dezenvolvimentu ba Timor-Leste, ho kooperasaun iha área defeza, seguransa no dezenvolvimentu.
“Austrália no Timor-Leste iha relasaun besik, bazeia ba konfiansa, amizade no ligasaun forte entre povu rua,” afirma Caitlin Wilson.
Enkontru ne’e diskute mós kona-ba impaktu Programa PALM, ne’ebé fó oportunidade ba traballadór Timoroan atu servisu iha Austrália.
Programa ne’e fó benefísiu ba nasaun rua, inklui aumentu kapasidade traballu no rendimentu ba traballadór Timoroan.
Prezidente Repúblika, José Ramos-Horta, antes ne’e simu relatóriu husi SEFOPE kona-ba progresu no rezultadu implementasaun Programa PALM.
Iha enkontru despedida ne’e, Embaixadora Caitlin Wilson hato’o agradese ba Prezidente Repúblika tanba entrega medalha kondekorasaun, nu’udar rekonesimentu ba nia servisu durante mandatu diplomátiku iha Timor-Leste.
(eme)
