PR Horta Hamutuk Familia Salesiana Don Bosco Partisipa Misa 100 SDB Eziste Iha TL

PR Horta Hamutuk Familia Salesiana Don Bosco Partisipa Misa 100 SDB Eziste Iha TL. (Foto: Media PR)

DILI, STLTIMORLESTE.com – Prezidente Republika (PR), José Ramos Horta hamutuk ho Família Salesiana Don Bosco partisipa misa agradesimentu abertura sentenária prezensa SDB tinan 100 iha Timor Leste.

Iha loron Sesta horiseik (31/01/2025) Prezidente Republika José Ramos Horta hamutuk Família SDB selebrasaun misa agradesimentu ba tinan 100 prezensa Primeira Espedisaun Saleziana Don Bosco nian iha Timor Leste, nuudar akontesimentu signifikativu tebes. Sentenariu ida nee marka sekulu ida evanjelizasaun, edukasaun no servisu nian husi Kongregasaun Saleziana ba povu Timoroan, liu-liu foin-sae sira.

Loron nee nuudar loron neebe signifikativu tebes ba Família Saleziana iha mundu tomak, inklui Timor Leste. Iha loron nee, Kreda selebra festa Saun João Bosco nian, fundador Kongregasaun Saleziana no apostolu boot foin-sae nian.

Don Bosco dedika nia moris ba edukasaun no evanjelizasaun ba foin-sae sira, liu-liu sira neebe kiak liu no abandonadu liu. Nia fiar katak dalan diak liu atu forma sarani diak no sidadaun neebe onestu mak liu husi ‘Razaun, Relijiaun no Domin’, prinsípiu sira neebe sai baze ba Don Bosco ninia sistema edukasional.

Misaun no Karisma Salesiana Ba Família Saleziana, loron ida nee nuudar momentu espesial selebrasaun, orasaun no renovasaun empenhu ba misaun Saleziana. Iha eskola sira, parokia sira, sentru foin-sae sira no komunidade relijioza saleziana sira iha mundu tomak, inklui Timor Leste, hodi halao Misa Festiva iha momentu reflesaun kona-ba Don Bosco nia legadu, atividade kultural no eventu sira ba foin-sae sira.

Iha tinan 2025, ida nee selebrasaun nee mos iha signifikadu kle’an liu tan ba Timor Leste, tanba kona mos ho aniversariu ba dala atus ida (100) Espedisaun Saleziana Dahuluk too iha rai doben ida nee. Ida nee reforsa impaktu no importansia misaun Saleziana nian iha formasaun ba foin-sa’e Timoroan sira iha sekulu ida nee.

Tanba nee, Prezidente Republika hamutuk ho Família SDB no ‘Colegio Fatumaka Abertura Missa Agradesimentu ba Sentenaria Presenza Salezianu iha Timor Leste, halao iha Santuariu Maria Auxiliadora Fatumaka, Baukau, iha nia signifikadu espiritual, edukativu no istoriku neebe klean ba Timor Leste. Hahu husi espedisaun saleziana dahuluk iha rai nee, Fatumaka sai nuudar sentru fiar nian, edukasaun no formasaun ba foin-sae Timoroan sira.

Misa agradesimentu neebe halao iha Igreja Santuariu Filhas de Maria Auxiliadora Fatumaka nee prezide direita husi representante Santa Se iha Timor Leste, Monsenhor Marco Sprizzi. Hetan mos partisipa husi Prezidente Repúblika José Ramos Horta, Líder Nasionál Lere Anan Timur, Provedor Virgílio da Silva Guterres ‘Lamukan’, Membru Parlamentu Nasional, familia Saleziana Don Bosco no sarani sira.

(eme)

Share it :

Leave a Reply

Your email address will not be published. Required fields are marked *