DILI, STLTIMORLESTE.com – Prezidente Republika (PR), Jose Ramos Horta halo enkontru ho visi Diretor Organizasaun Mundial Komersiu (OMK) ho ekipa koalia kona-ba avaliasaun neebe halo iha Timor Leste.
Bainhira remata halo enkontru, Visi Primeiru Ministru no Ministru koordenador Assuntu Ekonomia no Ministru Turizmu no Ambiente, Francisco Kalbuadi Lay ba jornalista sira iha Palasiu Prezidensial Nicolao Lobato, Bairo Pite, Segunda (10/02/2025) hatete, ohin hamutuk ho ekipa OMK mai hasoru malu ho Prezidente Republika Jose Ramos Horta, hodi koalia kona-ba avaliasaun neebe ekipa OMK halo iha Timor Leste.
“Ohin WTO hamutuk ho Adjuntu Sekretariu Jeral WTO, Embaixador ho nia ekipa tomak sira nain tolu mai iha nee halo avaliasaun dezde dia 3 too 13 Fevereiru, avaliasaun sira nee halo hotu ona,” katak nia.
Visi PM dehan, ondra boot mai hasoru Prezidente Republika, sira mai hatoo komprimentu ba Prezidente Republika, depois sira sei hasoru Primeiru Ministru Kay Rala Xanana Gusmão.
“Hahu ohin iha konferensia boot iha CCD Membru Governu ho Parlamentu ho komunidade universidade tomak, nomos ho komunidade lubuk ida, no bainrua mak hamutuk ho parseiru 13 sira,” katak nia.
Iha hasoru malu nee Prezidente Republika Jose Ramos Horta hatoo agradese ba WTO ba servisu neebe mak durante tinan barak ekipa nasional hamutuk ho WTO halo, tanba TL hanesan membru ida neebe tama WTO lalais deit iha tinan 7.
Prezidente Republika ho haksolok kongratula WTO ba saida mak durante nee sira kontribui, nunee oras nee TL tama ona ba membru 166. Antes nee 165 maibe aumenta TL agora membru hamutuk 166. No nasaun barak hakarak tama, balu tinan sanulu resin maibe seidauk konsege tama tanba la prienxe rekezitu neebe WTO fo.
(eme)
