DILI, STLTIMORLESTE.com – Prezidente Republika (PR), Jose Ramos Horta husu Timor Leste Hearts Fund kontinua apoiu Hospital Nasional Guido Valadares (HNGV), liu-liu ba tratamentu cardiologia/moras fuan.
Lia hirak nee hatoo husi CEO Timor Leste Hearts Fund, June Williams ba jornalista sira bainhira remata hasoru malu ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Tersa nee (08/04/2025).
CEO Timor Leste Hearts Fund, June Williams hatete, kontente tebes mai hasoru malu ho Prezidente Republika hodi update servisu neebe sira halo ba Prezidente Republika, aleinde nee Prezidente Republika mos husu Timor Leste Hearts Fund kontinua apoiu HNGV, nunee apoiu Timoroan iha area cardiologia/moras fuan.
“Sente kontente no apresia tebes hodi hasoru malu ho Prezidente Republika mai hamutuk ho doutor Herculano hanesan Xefe Departamentu Cardiologia mai update ba Prezidente kona-ba servisu Timor Leste Hearts Fund nia neebe parseria ho HNGV ho Ministeriu Saude, neebe foka ba area neebe partinente tebes hanesan area edukasaun, no iha semana ida nee ami mos sei halo workshop ruma atu nunee koalia kona-ba saude cardial ka saudavel ba Timoroan, ida nee mak ami sei halo iha workshop,” katak CEO.
Iha hasoru malu nee prezidente apresia tebes ba apoiu tomak neebe mak hetan husi Timor Leste Hearts Fund iha area cardiologia nia, nunee mos sua exelensia manifesta nia komitmentu atu kontinua fo apoiu ba pograma ida nee.
Nunee mos Xefe Unidade Cardiologista HNGV, Doutor Herculano S. do Santos hatete, durante Timor Leste Hearts Fund sai hanesan parseiru iha HNGV fo apoiu makaas ba iha programa fuan, deteksaun sedu, prevensaun nomos halo tratamentu ba Timoroan sira neebe sofre moras fuan, liu husi operasaun neebe sira halo iha Australia.
“Kazu sira neebe mak detekta iha nee refere ba Australia no Timor Leste Hearts Fund kontinua fo apoiu ba sira nia tratamentu iha neeba, balun konsege halo tratamentu intensive nomos sira balun halo operasaun fuan liu-liu ba kazu sira neebe liga ho fuan nomos problema ho labarik sira neebe moris mai ho problema fuan,” katak nia.
Nia hatete, iha tinan kotuk too mai agora Timor Leste Hearts Fund loke tan sira nia espasu atu fo apoiu ba iha formasaun ba iha rekursu umanu, no sira finaliza ona planu dezenvolvimentu rekursu umanus iha area cardiologia nia liu-liu formasaun espesial ida ba cardiologista sira nomos treinamentu no formasaun kontinua ba infermeiru sira neebe servisu area cardiologia.
Timor Leste Hearts Fund fo apoiu ba ekipamentu balun hanesan fo doasaun ba makina eko cartorgrafia programador nomos makina seluk.
“Ita espera katak ho apoiu husi Timor Leste Hearts Fund bele kontinua presta servisu neebe diak liu tan liu-liu iha area cardiologia ba populasaun Timor Leste,” katak nia.
(eme)
