DILI, STLTIMORLESTE.com – Prezidente Republika (PR), Jose Ramos Horta kondekora Postum Ordem Laran Luak ba saudozu Padre João Vasconcelos Baptista Felgueiras, SJ iha Igreja Katedral.
Iha biban nee, Adjunta Xefe Kaza Sivil, Graziela Fatima Liu Soares iha Igreja Katedral Dili, Tersa (07/07/2026) hatete, Prezidente Republika hatoo sentidu tristeza tanba lakon padre Joao neebe durante nee kontribui ba luta Indepedensia Timor Leste no fo aan tomak ba rai ida nee too hakotu nia vida ho idade 105.
Adjunta Xefe Kaza Sivil hatete, Prezidente Republika hatoo nia tristeza klean ba matebian, neebe hakotu vida iha loron 3 fulan Julhu tinan 2026, saudozu Reverendu João Vasconcelos Baptista Felgueiras, SJ sobrevivente luta ba independensia Timor Leste durante dekada barak nia laran.
Iha momentu moras no lutu ida nee, Prezidente Republika hatoo sentidu kondolensia boot liu ba ninia família no belun sira, no ba Kombatente Libertasaun Nasional sira hotu iha Timor-Leste, hodi destaka lakon boot neebe matebian Reverendu Padre João Vasconcelos Baptista Felgueiras, SJ, reprezenta ba nasaun.
“Votu agradesimentu profundu hatoo mos ba saudozu Padre João Vasconcelos Baptista Felgueiras, SJ, neebe dedika liu meiu sekulu nia moris ba servisu povu timoroan nian. Ita hanoin hikas ho gratidaun partikular ninia misaun pastoral, edukativa no umanitaria neebe la kole, no mos ninia kontribuisaun folin laek ba prezervasaun no promosaun lian portuges, ba edukasaun jerasaun tui tuir malu timor oan sira-nian, no ba afirmasaun valor sira dignidade umana, solidariedade no esperansa nian. Ninia legadu sei sai nafatin nuudar testamentu ida neebe dura ba moris ida neebe dedika tomak ba Timor Leste no dezenvolvimentu umanu ninia povu nian,” dehan Adjunta Xefe Kasa Sivil.
Nunee mos Xefe Kaza Sivil Prezidensia Republika, Henriqueta Maria da Silva hatutan, Prezidente Republika entrega Postuma Orden Laran Luak ba Reverendu Padre João Vasconcelos Baptista Felgueiras, SJ, konsidera katak Konstituisaun Republika Demokratika Timor Leste konsagra, iha nia artigu 11, rekonesimentu no apresiasaun ba rezistensia sekulu barak husi Povu Mauberre hasoru dominasaun estranjeiru no kontribuisaun husi ema hotu neebe luta ba independensia nasional.
Xefe Kaza Sivil dehan, reafirma vontade atu fo onra ba kombatentes libertasaun nasional hotu-hotu, tuir termu sira Lei No. 3/2006, loron 12 fulan-Abril nian, neebe altera hosi Lei No. 9/2009, loron 29 fulan-Jullu, no hosi Lei No. 2/2011, loron 23 fulan-Marsu, ba sira-nia partisipasaun dedikadu no onradu iha Luta Independensia Nasional.
Sublina dimensaun sira apresiasaun no rekonesimentu publiku nian ba Rezistensia timoroan no prezervasaun memoria koletiva nian, neebe materializa liu hosi fo elojia sira iha serimonia publika solene sira.
“Konsidera katak sub-alínea e) hosi alínea 1 hosi artigu 32 husi Estatutu Kombatente Libertasaun Nasional nian estabelese katak Orden Laran Luak tenke fo ba ema estranjeiru sira neebe rekonese nuudar Kombatente Libertasaun Nasional,” dehan Xefe Kasa Sivil.
Nia hatutan, ho proposta husi Konselhu Kombatentes Libertasaun Nasional, Prezidente Republika, iha ezersísiu kbiit rasik neebe prevee iha sub alínea j) husi artigu 85 husi Konstituisaun no iha sub-alínea e) husi n.º 1 husi artigu 32 husi Estatutu Kombatentes Libertasaun Nasional, Artigu 32, nº 1, husi Lei Nº/2020, 2012 fulan-abríl neebe altera ona. ho Lei No. 9/2009, loron 29 fulan Jullu, no ho Lei No. 2/2011, loron 23 fulan Marsu.
Tuir observasaun neebe STL hetan antes kondekora hahu ho misa Requem Eucaristia Santa nee, atu hatudu domin, amizade, estima no gratidaun belun, Padre João Vasconcelos Baptista Felgueiras, S.J. Maibe, liu-liu halibur malu atu hatudu fiar iha Maromak moris nia hun, neebe haraik ona moris lao rai ba Pe. João Vasconcelos Baptista Felgueiras, no sei haraik mos ba nia moris rohan laek.
Missa ida nee halibur timor oan sira hotu nia asaun de graças, tamba buat diak hotu neebe Nai Maromak halo ona ba povu no Kreda iha Timor, liu husi Pe. João Vasconcelos Baptista Felgueiras, nia knaar missionaria tinan lima nulu resin lima (55) iha Timor Leste. Iha Timor, ema hotu koinese Padre João Vasconcelos Baptista Felgueiras nuudar Missionario ida neebe haraik-an, simples, fo testemunho moris nian ba ema hotu, nakonu ho generosidade, integridade, no oferece-an tomak ba misaun Nai Maromak nian, liu-liu ba povo doben Timor Leste feto no mane neebe kiik no mukit sira.
(eme)
