DILI, STLTIMORLESTE.com – Prezidente Repúblika (PR), José Ramos-Horta loke Programa Bee, Pás no Diplomásia, hodi hametin kooperasaun internasionál ba jestaun bee no protesaun ambiente.
Programa ne’e hala’o iha Palásiu Prezidensiál Nicolau Lobato, Bairru Pité, Dili, segunda-feira (26/10/2026), ho partisipasaun reprezentante nasaun ASEAN, Nepal, Austrália no Organizasaun Nasoins Unidas (ONU).
Iha abertura, Prezidente Ramos-Horta hato’o agradese ba parte hotu ne’ebé kontribui ba realizasaun programa ne’e, no subliña importánsia bee ba moris umanu no ambiente.
Xefe Estadu enfatiza katak rekursu bee presiza hetan protesaun no konservasaun, tanba desempena papél importante ba sustentabilidade moris umanu no ekosistema.
Programa ne’e organiza hamutuk entre Palásiu Prezidensiál, Permatil no parseiru sira, hodi promove kooperasaun internasionál no buka solusaun ba dezafiu jestaun rekursu bee.
Fundadór Permatil, Ego Lemos, esplika katak programa ne’e sai plataforma importante atu hametin kooperasaun entre Timor-Leste no nasaun sira seluk, liuliu iha área jestaun bee.
“Ohin dader Prezidente Repúblika loke ona programa ne’e, ho mensajen kona-ba importánsia kooperasaun iha jestaun bee, liuliu ba Timor-Leste no Indonézia,” dehan Ego Lemos.
Nia hatutan katak partisipante sira mai husi nasaun ASEAN, inklui Laos, Kamboja no Tailándia, hamutuk ho reprezentante husi Nepal, Austrália no ONU.
Ego Lemos konsidera programa ne’e oportunidade atu dezenvolve solusaun hamutuk ba problema bee, liuliu iha situasaun El Niño no mudansa klimátika ne’ebé afeta komunidade sira.
Nia informa katak delegasaun Permatil vizita komunidade sira iha Dare, ne’ebé kontinua hetan bee-masker maski enfrenta kondisaun rai maran no menus bee.
“Ida-ne’e hatudu katak asaun ne’ebé ita halo iha Timor-Leste bele sai ezemplu di’ak no ajuda hamenus konflitu entre komunidade,” dehan Ego Lemos.
Ego Lemos, ne’ebé mós Enviadu Espesiál ba Kultura, Ambiente no Rekursu Bee, afirma katak Permatil sei kontinua promove konservasaun bee hamutuk ho joven sira.
Nia esplika katak, atividade hirak-ne’e sei hala’o liuhusi akampamentu no formasaun téknika anuál, hodi hasa’e kapasidade joven sira atu proteje rekursu bee iha komunidade.
(eme)
