BAUKAU, STLTIMORLESTE.com – Prezidente Republika (PR), José Ramos Horta ofisialmente lori sai ona sidadaun idoza Maria da Costa neebe hela iha fatuk kuak durante tinan 10, iha area Badunau, Aldeia Lulihene, Suku Bukoli, Postu Administrativu Baukau Vila, Munisipiu Baukau.
Tuir istoria idoza Maria da Costa deside hela iha fatuk kuak hafoin laen kaben mate iha tinan 9 liu ba, tanba razaun lakohi halo kolen familia no oan sira.
Durante tinan naruk idoza refere hela iha fatuk kuak no labele hetan Uma Naroman ba Povu (UNP) husi Governu, tanba razaun laiha dokumentus.
Kondisaun nee Maria da Costa infenta no hela nonok iha fatuk kuak, maibe iha tinan kotuk ekipa Prezidensial da Republika konsege too fatin hodi ajuda trata dokumentus no iha fulan Abril nee prezensa direita husi Prezidente Republika, José Ramos Horta hodi ofisialmente bolu sai idoza refere husi fatuk kuak no haruka idoza refere provizoriu hela ho nia familia iha area Badunau hodi hein prosesu konstrusaun uma neebe apoiu husi Prezidensial.
“Tinan 10 ona avo nee hela iha nee, hau foin rona informasaun, prezidensial halo uma foun ida kompletu baibain halo fulan tolu nia laran tenke prontu,” PR José Ramos Horta hateten ba jornalista sira iha ambitu bolu sai idoza refere husi fatuk kuak, iha area Badunau, Aldeia Lulihene Bukoli, Sabado (18/04/2026).
Hafoin PR lori sai idoza refere kontinua kedas ba seremonia lansamentu fatuk dahuluk ba konstrusaun uma ho valor orsamentu rihun US$ 14 resin, neebe sei responde ba uma kuartu 2, dapur ida kompleta kedas ho nia fasilidade, sala vizita kompleta ho televizaun no armariu inklui fatin sanitariu.
Konstrusaun uma refere responsabilidade husi ekipa Prezidensial Republika ho durasaun fulan 3 no bainhira uma refere finaliza sei entrega ba idoza Maria da Costa hodi hela, maibe Prezidente Republika mos fo opsaun ba idoza refere atu hili negosiu ou hakiak animal nunee bele hetan rendimentu sustenta moris loro loron durante moris hela iha uma refere.
PR José Ramos Horta aprezenta, orsamentu ba konstrusaun uma refere apoiu masimu husi Governu, tanba Primeiru Ministru Kay Rala Xanana Gusmão rasik konsidera, programa Prezidensial nian neebe halo uma ba oan kiak no familia vuneravel sira importante atu halao.
“Balu koalia mangame iha Parlamentu nee laos Prezidente nia mandatu nee solidariedade, lei bele difini hanesan nee mais hau nia konsiente mos hateten hau tenke ajuda hakmaan avo sira kosok oan sira, tanba nee hakarak hasai avo husi fatin nee ba fatin seluk,” Horta akresenta.
Iha fatin hanesan benefisiaria idoza Maria da Costa ho sentimentu kontente hatoo obrigadu ba Prezidente Republika José Ramos Horta.
Enkuantu benefisiaria nia familia Agostinho Belo Maululik aprezenta, idoza Maria da Costa nuudar nee bolu atu hela ho familia, maibe idoza rasik lakohi, tanba razaun lakohi halo kolen familia no oan sira, nunee deside hela mesak iha fatuk kuak refere, maibe liu husi apoiu PR nian neebe halo ona konstrusaun uma bele ajuda ona idoza refere.
“Bainhira uma nee hotu hau hanoin hau nia bin bele hela kontente ona ami promete nia la ba ona hela iha fatuk kuak neeba,” Agostinho Belo Maululik espresa.
Entretantu atividade vizita PR nian iha Badunau hodi halo lansamentu fatuk dahuluk ba konstrusaun uma ba idoza Maria da Costa, hetan akompanha husi Ministru Agrikultura Pekuaria Peskas no Floresta Marcos da Cruz inklui Prezidente Autoridade Munisipiu Baukau Veneranda Lemos, Komadante Komando Polisia Munisipiu Baukau Superintendente João Sancho Pires, Autoridade Postu Baukau Vila no Autoridade Suku Bukoli.
(tom)
