DILI, STLTIMORLESTE.com — Prezidente Repúblika (PR), Jose Ramos Horta hamutuk ho Laureadu Nobel, Lauriadu Turing Award, sientista, akadémiku no figura internasionál sira, vizita Tambling Wildlife Nature Conservation (TWNC), iha Lampung, Sumatra, Indonézia, iha loron 27 no 28 Agostu 2026, hodi haree diretamente esforsu konservasaun no promove protesaun ba biodiversidade globál.
Tuir komunikadu ne’ebé STL asesu Sabadu nee (29/08/2026) hatete, vizita ne’e hala’o hafoin Siméira Internasionál Siénsia ba Dezenvolvimentu 2026 iha Dili, ne’ebé Prezidente Ramos-Horta mak inisiador no halibur laureadu Nobel no sientista sira husi nasaun oioin.
Durante vizita iha TWNC, delegasaun ne’e haree diretamente biodiversidade no ekosistema oioin iha área konservasaun ne’e, inklui ai-laran tropikál, floresta tasi-ibun, mangrove, lagoa no área húmida. TWNC iha área floresta hamutuk besik 48.153 hektare no área tasi hamutuk 14.089 hektare.
Delegasaun ne’e hetan simu husi deputada Indonézia, Siti Hediati Soeharto ka Titiek Soeharto, ne’ebé sai anfitriã ba atividade ne’e. Kestaun prinsipál iha vizita mak konservasaun biodiversidade, mudansa klimátika, siénsia no teknolojia, no dezenvolvimentu sustentável.
TWNC iha esperiénsia konservasaun durante tinan barak no konsidera nu’udar espasu ne’ebé bele hamutuk natureza, siénsia, edukasaun no kooperasaun internasionál. Vizita laureadu Nobel no figura mundiál sira ne’e fó oportunidade atu fahe koñesimentu no buka dalan foun atu hametin protesaun biodiversidade.
Titiek Soeharto hatete, katak konservasaun la’ós projetu badak, maibé kompromisu naruk ba jerasaun sira iha futuru. Nia mos konsidera Tambling bele sai hanesan “laboratóriu moris”, ne’ebé natureza bele hasoru siénsia, teknolojia, edukasaun no relasaun internasionál.
Vizita ne’e reforsa importánsia kolaborasaun entre lideransa, komunidade siéntifika, governu no setór privadu atu hametin esforsu globál ba protesaun ambiente, biodiversidade no dezenvolvimentu sustentável.
(eme)
