DILI, STLTIMORLESTE.com – Prezidente Republika (PR), José Ramos Horta partisipa loron Nasional Australia iha Timor Leste, hamutuk ho diplomatika nivel altu.
Iha Kinta kalan (30/01/2025) Prezidente Republika, Jose Ramos Horta hamutuk ho ofisial Australianu sira, inklui Ministru Asuntu Internu Tony Burke, iha selebrasaun loron Nasional Australia nian iha Díli, hodi destaka amizade hori uluk entre nasaun rua nee no marka tinan 50 prezensa diaspora Timoroan nian iha Australia.
Prezidente Republika Jose Ramos Horta liu husi nia diskursu hatete, hanoin hikas apoiu signifikativu neebe Australia fo ba refujiadu Timoroan sira neebe buka abrigu husi funu sivíl no okupasaun estranjeiru dezde Agostu 1975.
Xefe Estadu sublina, oinsa aktu hospitalidade dahuluk sira nee harii fundasaun ba relasaun bilateral ida neebe metin no buras nafatin liu husi programa kooperasaun oin-oin iha trabalhu, edukasaun no kuidadu saude.
Prezidente destaka parseria dezenvolvimentu neebe lao hela entre nasaun rua nee hodi nota selebrasaun foin lalais nee iha Dezembru 2024 ba ita nia aniversariu kooperasaun ba tinan 25. Espesifikamente nia mensiona kompromisu Australia nian hodi apoia dezenvolvimentu sustentavel Timor Leste nian, inklui kolaborasaun potensial ba projetu kampu Greater Sunrise iha Timor Leste nia Kosta Sul.
Durante selebrasaun nee, Ramos Horta rekonhese Australia nia apoiu istoriku husi kooperasaun iha Funu Mundial Daruak too Australia nia lideransa iha misaun INTERFET 1999, neebe halao papel krusial iha Timor Leste nia dalan ba ukun rasik aan.
Nia konklui hodi sublina importansia hodi kontinua hametin relasaun bilateral sira bainhira Timor Leste aprofunda nia integrasaun rejional liu husi ASEAN no enkuadramentu internasional sira seluk.
(eme)