DILI, STLTIMORLESTE.com — Prezidente Repúblika (PR), José Ramos Horta simu karta apresiasaun formál husi Prezidente Filipina, Ferdinand R. Marcos Jr., ba solidariedade no mensajen kondolénsia ne’ebé Timor-Leste (TL) hato’o ba povu Filipina hafoin rai-nakdoko ho magnitude 7,8 akontese iha parte súl nasaun ne’e, iha 8 Juñu 2026.
Karta ne’e simu husi Prezidente Ramos Horta iha Sesta nee (28/08/2026), no konsidera hanesan rekoñesimentu ba solidariedade husi Governu no povu Timor-Leste ba família no komunidade sira ne’ebé hetan impaktu husi dezastre naturál ne’e.
Prezidente Ferdinand R. Marcos Jr., iha ninia karta resposta, hato’o apresiasaun sinseru ba Prezidente Ramos-Horta no povu Timor-Leste tanba mensajen simpatia, kondolénsia no preokupasaun ba situasaun povu Filipina.
“Ha’u hakarak hato’o ha’u-nia apresiasaun sinseru ba ita-nia mensajen simpatia no kondolénsia hafoin rai-nakdoko ne’ebé akontese iha parte súl Filipina nian,” hatete Prezidente Marcos Jr.
Nia hateten, liafuan no espresaun solidariedade husi Timor-Leste fó konfortu ba povu Filipina durante períodu difísil ne’e, liuliu ba família sira ne’ebé afetadu diretamente husi dezastre.
Prezidente Filipina mós hato’o agradesimentu ba kondolénsia Prezidente Ramos-Horta ba família vítima sira no ba preokupasaun Timor-Leste kona-ba bem-estar komunidade sira ne’ebé hetan impaktu.
Antes ne’e, iha karta datada 9 Juñu 2026, Prezidente José Ramos-Horta hato’o tristeza profunda no solidariedade husi povu Timor-Leste ba povu Filipina hafoin rai-nakdoko maka’as ne’ebé akontese iha parte súl nasaun ne’e.
Prezidente Ramos Horta hateten katak Timor-Leste simu ho tristeza boot notísia kona-ba rai-nakdoko magnitude 7,8 ne’ebé rezulta iha lakon vida, ema kanek no estragus materiál.
Nia hato’o kondolénsia ba família vítima sira, deseja rekuperasaun lalais ba ema sira ne’ebé hetan kanek no espresa solidariedade ba komunidade afetada.
Prezidente Ramos Horta mós hato’o apresiasaun ba esforsu autoridade Filipina no ekipa resposta emerjénsia sira ne’ebé servisu atu tulun populasaun afetada no restaura normalidade iha área sira ne’ebé hetan impaktu.
Rai-nakdoko magnitude 7,8 ne’e akontese iha parte súl Filipina, ho sentru besik General Santos City, iha ilha Mindanao. Autoridade Filipina relata katak dezastre ne’e hamosu estragus iha edifísiu sira no vítima sira, enkuantu ekipa emerjénsia kontinua halo operasaun buka no salva.
Troka karta entre Prezidente Ramos Horta no Prezidente Marcos Jr. ne’e reafirma lasu amizade, respeitu malu no solidariedade rejionál entre Timor-Leste no Filipina, liuliu iha tempu nasaun ida hasoru dezastre no difikuldade.
(eme)
