DILI, STLTIMORLESTE.com – Prezidente Republika (PR), Jose Ramos Horta simu vizita ofisial eis Prezidente Republika Indonezia, Ibu Megawati Sukarnoputri, iha Aeroportu Internasional Prezidente Nicolau Lobato, Comoro.
Iha loron Kuarta nee (08/07/2026) Prezidente Republika Jose Ramos Horta ho Primeiru Ministru Kay Rala Xanana Gusmão no membru Governu simu eis Prezidente Republika Indonezia dalima, Ibu Megawati Soekarnoputri, iha Aeroportu Internasional Nicolau Lobato, ho vizita nee hametin relasaun bilateral no diplomatika entre nasaun rua.
Bainhira eis Prezidente Republika Indonezia too iha Aeroportu simu husi Vise PM, Charge dAffairs Indonezia, no entrega ai-funan ou tesi tais. Simu husi Prezidente Republika Jose Ramos-Horta, Primeiru Ministru Xanana Gusmão, Ministru Negosiu Estranjeiru Bendito Freitas no delegasaun.
Hafoin serimonia resepsaun, Ibu Megawati Soekarnoputri sei ba deskansa iha Hotel Palm Springs no sei simu husi Chairman & CEO Jackson Lay.
Tuir ajenda, Ibu Megawati Soekarnoputri sei halo enkontru bilateral ho Presidente Republika Jose Ramos Horta no Primeiru Ministru Kay Rala Xanana Gusmão. Vizita Ibu Megawati Soekarnoputri mai Timor Leste marka pasu importante ida entre rai rua, no hametin liu tan lasu amizade entre Timor Leste no Indonezia.
Agenda bilateral entre Ibu Megawati, Prezidente Jose Ramos Horta no Primeiru Ministru Kay Rala Xanana Gusmão bele sai oportunidade atu troka hanoin kona-ba dezafiu rejional no mundial, no buka dalan atu promove dame, estabilidade no prosperidade ba povu iha rai rua nee.
Prezidente Republika Jose Ramos Horta hatete, Ibu Megawati too iha dia 8 no iha loron 9 fulan Julhu sei halo enkontru ho Prezidente Republika Jose Ramos Horta, iha enkontru nee Prezidente Republika mos sei kondekora Kolar Ordem Timor Leste ba Eis PR Indonezia, Ibu Magawati.
Prezidente Jose Ramos Horta sei fo Grand Collar da Ordem de Timor-Leste, kondekorasaun aas liu Estadu Timor Leste nian ba Megawati Soekarnoputri, ida nee nuudar onra ida ba rekonhese Ibu Megawati nia kontribuisaun ba prosesu rekonsiliasaun no dezenvolvimentu relasaun diak entre Timor Leste no Indonezia.
Megawati Soekarnoputri mak Prezidente dalima ba Republika Indonezia no feto potensial dahuluk neebe kaer kargu Prezidente, no ninia vizita mai Timor Leste hametin liu tan lasu amizade no respeitu malu entre povu rai rua.
(eme)
