DILI, STLTIMORLESTE.com – Prezidente Republika (PR), Jose Ramos Horta hatoo kongratulasaun ba Organizasaun Mundial Komersiu (OMK), tanba simu Timor Leste lais iha tinan 7 deit sai ona membru OMK.
Lia hirak nee hatoo husi Visi Primeiru Ministru no Ministru koordenador Assuntu Ekonomia no Ministru Turizmu no Ambiente, Francisco Kalbuadi Lay ba jornalista sira iha palasiu Prezidensial Nicolau Lobato, Bairo Pite, Dili, Segunda (10/02/2025).
Nia hatete, durante enkontru entre Prezidente Republika Jose Ramos Horta ho Visi Diretor OMK no ekipa, koalia kona-ba avaliasaun neebe halo iha Timor Leste, Xefe Estadu kongratula OMK tanba simu Timor Leste sai membru.
“Prezidente agradese ba OMK servisu durante tinan barak ekipa nasional hamutuk ekipa WTO, nunee hanesan ita boot sira hotu hatene, Timor Leste hanesan membru ida neebe mak tama ba WTO iha mundu, tinan 7 deit agora tama ona full membru ou depois sai membru, saida mak ita tenke halo, tanba nee durante semana rua ami tekniku husi nasional, nunee mos hamutuk ho sira neebe mai husi WTO mai hamutuk atu sosializa diak liu tan,” hatete governante nee.
Governante nee hatutan, horiseik (Domingu) Ekipa WTO mai hamutuk, oinsa mak halo sosializa diak liu tan, benefisiu saida mak Timor Leste tama ba membru Organizasaun Mundial Komersiu OMK ou WTO.
“Prezidente ho haksolok tebes kongratula ba Organizasaun Mundial Komersiu OMK ou WTO, no agradese ba saida mak durante nee sira apoiu ba Timor Leste tama ona ba membru ba numeru 166, antes nee iha numeru 165 agora ita tama ona ba numeru 166,” katak nia.
Nia hatete, nasaun seluk hakarak sai membru ba Organizasaun Mundial Komersiu balu hein too tinan sanulu resin no tinan rua nulu ona, maibe seidauk tama tanba seidauk prense rekejitu husi WTO.
Tanba nee, Xefe Estadu, Jose Ramos Horta kongratula ba apoiu husi Organizasaun Mundial Komersiu ba nia suporta, no apoiu Timor Leste tama lalais deit ba membru durante tinan 7 nia laran deit.
Iha biban nee Visi Diretor Jerál OMK, Zhang Xiangchen hatete, sente kontente bele vizita Timor Leste hodi haree hamutuk kona-ba assuntu tekniku, tanba nee ohin hamutuk hahu eventu nivel aas ho ajensia sira, ofisial senior sira kona-ba implementasaun OMK nuudar kompromisu, neebe Timor Leste iha, tanba Timor Leste asina ona protokol adezaun ba OMK iha tinan kotuk 2024, iha abu Dhabi.
Tanba nee sira hakarak aproveita oportunidade hodi ajuda Timor Leste, atu maksimiza benefísiu husi integrasaun iha sistema formasaun multilateral.
(eme)
