DILI, STLTIMORLESTE.com – Iha Resepsaun Diplomatika Anula neebe halao iha Palasiu Prezidensial, iha loron kuarta no Kinta, Prezidente Republika (PR), Jose Ramos Horta kondekora Embaixador Estadu Unidus Amerika ho Grau Colar Ordem Timor Leste.
Tuir komunikadu neebe STL asesu husi media PR, Sesta nee (21/02/2025) hatete, Prezidente Republika Jose Ramos Horta Horta, kondekora Grau Colar Orden Timor Leste ba Embaixadora Estraordinaria no Plenipotensiaria Estadus Unidus Amerika nian mai Republika Demokratika Timor-Leste, Donna Ann Welton, iha Resepsaun Diplomatika Anual 2025 neebe halao iha Palasiu Prezidensial Nicolau Lobato. Kondekorasaun ida nee rekonhese ninia servisu esensional iha hametin relasaun bilateral entre Timor Leste no Estadus Unidus Amerika.
Durante ninia mandatu, Embaixadora Welton hatudu kompromisu neebe la iha presedente atu komprende no serbí Timor Leste, hodi sai hanesan Embaixadora Estadus Unidus dahuluk neebe vizita munisípiu 13 hotu iha nasaun nee.
Ninia abordajen ba diplomasia inklui halo kontaktu ho sidadaun sira iha nivel hotu sosiedade nian, husi ofisial sira aas ba labarik eskola sira iha area rural, no partisipa ativamente iha inisiativa kultural, seguransa no dezenvolvimentu ekonomiku.
Realizasaun importante durante mandatu Embaixadora Welton nian inklui fasilita kooperasaun defeza krusial entre Timor Leste no Guarda Nasional Rhode Island, estabelese programa Inkubador Negosiu hodi promove kresimentu ekonomiku, no apoiu projetu prezervasaun kultural liu husi programa bolsa Estadus Unidus nian.
Prezidente Ramos Horta hatete, nuudar rekonhesimentu ba kontribuisaun estraordinaria Embaixadora Donna Ann Welton nian hodi hametin ligasaun entre Estadus Unidus Amerika no Timor Leste.
No ninia servisu dedikadu neebe benefisia sidadaun Timoroan barak iha tinan hirak nia laran, ho onra boot hau kondekora ba nia Grau Colar Orden Timor Leste nian.
“Embaixadora Welton nia esforsu hodi promove amizade entre ita nia povu sai fundamental ba pas, estabilidade nasional, no dezenvolvimentu Timor Leste nian. Kondekorasaun ida nee reprezenta apresiasaun aas liu husi ita nia nasaun ba ninia servisu no kompromisu estraordinaria hodi promove parseria forte entre ita nia nasaun rua.” Katak PR Horta.
Embaixadora Welton nia rekonhesimentu reflete parseria neebe dura entre Timor Leste no Estadus Unidus, neebe kontinua buras liu tan liu husi kompromisu hamutuk ba demokrasia, dezenvolvimentu ekonomiku no seguransa rejional.
Nasaun rua nee nafatin dedikadu hodi avansa interese komun hirak nee no hakbiit amizade neebe klean entre povu Amerikanu ho Timoroan sira.
(eme)
