PR Simu Karta Kredensial Husi Embaixadora Filipina

Embaixadora Filipina mai Timor Leste, Anne A Padua entrega karta kredensial ba Prezidente Republika (PR), Jose Ramos Horta. (Foto: Media PR)

DILI, STLTIMORLESTE.com – Prezidente Republika (PR), Jose Ramos Horta simu karta kredensial husi Embaixadora Filipina mai Timor Leste, Anne A Padua, hodi hametin kooperasaun bilateral iha futuru.

Bainhira remata entrega Karta Kredensial, Visi Ministra ba Asuntu ASEAN, Milena Rangel ba jornalista sira iha Palasiu Prezidensial, Nicolau Lobato, Bairo Pite, Dili, Kinta (30/01/2025) hatete, ohin marka tan pasu importante ida, tanba Prezidente Republika simu tan karta kredensial husi Embaixadora Filipina mai Timor Leste.

“Ohin senhora Embaixadora Filipina mai Timor Leste, entrega karta kredensial ba Prezidente Republika atu komesa nia servisu husi ohin, normalmente ate tinan 3 nia laran, depois simu tiha karta kredensial ida nee iha fila fali enkontru bilateral entre PR, Horta ho Embaixadora, koalia kona-ba kooperasaun bilateral neebe eziste entre nasaun rua, ita nia adezaun ba ASEAN,” hatete Milena.

Governante nee hatutan, kooperasaun neebe eziste liu-liu apoiu ba iha edukasaun nomos saude, tanba agora daudaun Timoroan lubuk ida mak halao estudu iha Filipina, depois mos ho fundu dezenvolvimentu kapital umanu neebe ke haruka ona estudante Timoroan lubuk ida eskola iha universidade sira neebe iha Filipina.

“No Eziste mos kooperasaun ida bolu teknikal kooperasaun neebe ita halo dialogu tinan balun liu ona ba, mais agora hanoin atu reativa fila fali dialogu ida nee, teknikal kooperasaun entre Timor Leste ho Filipina bele reativa fila fali hodi haree no reviu fila fali kooperasaun neebe eziste, depois haree setor foun ita nasaun rua bele troka esperiensia ba malu ho kooperasaun, nee enkontru bilateral neebe ohin koalia toka ba assuntu sira nee” dehan governante nee.

Nia hatutan, estudante neebe mak halao estudu iha Filipina nee hili tuir idak-idak nia jurusan, balu hili sosial nomos balu medisina. Importante mak Filipina fo oportunidade ba estudante Timoroan ba eskola iha neeba, iha universidade neebe konsideradu, no kooperasaun ida nee sei kontinua nafatin no haree tan ba oin sei iha oportunidade seluk bele aumenta tan lista kooperasaun entre Timor Leste ho Filipina, depois teknika iha MNEK nia kooperasaun ho linas Ministeriais sira tuur hamutuk haree fila fali ba kooperasaun neebe iha potensialidade entre TL ho Filipina atu koopera malu hamutuk iha futuru.

Nunee Embaixada Filipina dezde inisiu kedas estabelese nia Embaixada iha Timor Leste, tanba nee agora daudaun husi sudeste Aziatiku maioria Embaixada sira iha TL hein tan rua ka tolu atu mai tan estabelese.

Prezidente Republika, Jose Ramos Horta iha enkontru kortejia nee hatoo benvindu ba Embaixadora Filipina mai Timor Leste, no Prezidente Republika mos sempre fo apoiu tomak ba reprezentante husi nasaun seluk mai Timor Leste.

Prezidente Republika mos hatete, karik Embaixadora presiza apoiu, saida mak presiza PR nia apoiu, PR prontu hamutuk ho Ministru Negosiu Estranjeiru no Kooperasaun sira neebe ligadu ho linhas Ministerial sira seluk prontu bele ajuda Embaixador no Embaixadora sira neebe iha Timor Leste.

(eme)

Share it :

Leave a Reply

Your email address will not be published. Required fields are marked *