DILI, STLTIMORLESTE.com – Progresu estudante sira iha prátika téknika depende liu ba kritéria ne’ebé estabelese iha sistema avaliasaun kualifikasaun nian.
Diretor Eskola ESTV-IT 28 de Novembro Becora-Díli, Tomas Pinto hato’o informasaun ne’e ba STL iha nia knaar fatin, Segunda (31/08/2026).
“Progresu estudante sira nian iha prátika téknika depende liu ba kritéria ne’ebé estabelese iha sistema avaliasaun kualifikasaun nian. Iha edukasaun téknika-vokasionál, avaliasaun ba prátika baibain fahe ba área boot tolu,” dehan Tomas.
Nia esplika katak, kritéria avaliasaun prátika téknika inklui koñesimentu tékniku no prosedimentu, kapasidade estudante atu hili ekipamentu ne’ebé loos, kumpri etapas servisu nian (SOP), no komprende teoria ne’ebé relasiona ho prátika.
Tuir Tomas, avaliasaun mos haree ba abilidade no kualidade servisu, inklui prosedimentu ezekusaun ne’ebé loos, kapasidade atu foti medida ka halo instalasaun, no kualidade produtu ka servisu final.
Aleinde ne’e, seguransa no higiene iha fatin prátika ka laboratóriu mos sai parte importante iha avaliasaun. Estudante sira presiza uza ekipamentu protesaun individual (EPI/EPE), kumpri regra seguransa iha ofisina ka laboratóriu, no kuidadu didi’ak ba ekipamentu servisu.
“Atitude no étika servisu mos importante, hanesan disiplina ba tempu, matenek atu rezolve problema (troubleshooting), no kapasidade komunikasaun ka servisu hamutuk iha ekipa,” nia haktuir.
Iha parte seluk, Diretor Eskola Hotelaria no Turizmu Becora, Charles F. Guterres, dehan katak ho ekipamentu ne’ebé iha agora, estudante sira nafatin partisipa iha atividade prátika depois de simu teoria husi professores.
“Hau hanoin, ho ekipamentu ne’ebé iha, estudante sira nafatin partisipa iha prátika. Sira simu uluk teoria husi professores, depois hala’o kedas prátika. Maibé ba futuru, presiza aumenta tan ekipamentu prátika ba estudante sira, hanesan komputador no ekipamentu seluk,” dehan Charles.
Nia hatutan katak, eskola téknika-vokasionál la fó deit teoria ba estudante sira, maibé fó mos oportunidade atu hala’o prátika. Tanba ne’e, estudante sira husi departamentu ida-idak kontinua hala’o atividade prátika ho ekipamentu ne’ebé disponivel iha eskola.
Iha parte ketak, Diretor Nasional Ensinu Sekundáriu iha Ministériu Edukasaun (ME), Benjamin Gomes da Cruz Fernandes, hatete katak estudante sira iha ensinu téknika-vokasionál presiza hala’o prátika atu bele dezenvolve sira-nia kapasidade no abilidade téknika.
“Ita-nia estudante sira iha ensinu téknika-vokasionál presiza hala’o prátika. Tanba ne’e, ME nafatin fó apoiu ekipamentu prátika nian ba sira,” nia afirma.
(jac)
