DILI, STLTIMORLESTE.com – Presiza hadia kualidade edukasaun liu husi formasaun ba profesores sira, liu-liu oinsa mak bele investe diak liu tan ba manorin sira.
Liafuan nee haktuir husi Madre Guilhermina Marcal bá jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Tersa (11/02/2025).
Nia hatete, ohin hasoru malu ho Prezidente Republika hodi koalia asuntu edukasaun ba labarik sira.
Madre dehan, ohin sei simu premiu ida kona-ba kultural no mai koalia ho Prezidente kona-ba asuntu sosiais laos koalia asuntu seluk.
“Liu-liu edukasaun kona-ba labarik sira, edukasaun ita presiza hadia kualidade edukasaun formasaun ba profesores sira, liu-liu kona-ba kooperasaun oinsa mak investe diak liu tan ita nia profesores sira,” katak Madre.
Madre dehan, presiza haree labarik sira, tanba sira mak futuru ba nasaun nian, tanba nee presiza forma sira didiak iha nivel estudu.
“Nee dezempenhu ema hotu-hotu nia, ema bele iha osan barak maibe hau pesoal la dezempenha hau nia aan nee. Ita laiha aproveitamentu buat ida mak ita falta domin leitura biblia, ita tenke lee barak para sai hanesan parte ita atu halo peskiza ka esplora konhesimentu iha rai laran ka internasionalmente,” katak nia.
Madre nee dehan, ohin loron uza teknolojia halo ema matenek kuandu uza ho responsabilidade ho maturidade. Eskola ida neebe mak bele uza ida nee inrikeze riku ho konhesimentu parte siensia nia nomos esplorasaun ba buat hotu neebe akontese iha mundu, tanba nee mundu sai kiik tan. Mundu ohin loron Santu Padre dehan sai uma ida deit.
Nunee iha hasoru malu nee koalia mos kona-ba asuntu liga ho enjeneiru husi Emiratus sei mai halo kontrusaun iha Balide, maibe ida nee Madre sei hatoo ba Madre Superior iha Roma.
“Prezidente fo ona karta ba ami atu koalia no haree hamutuk hafoin haruka ba Roma, no karta nee Prezidente ohin entrega ona ba hau, no ohin enkontru Prezidente aprezenta mos kona-ba ida nee,” katak Madre.
Iha biban nee, Prezidente Republika José Ramos Horta sente kontente hasoru malu ho Madre Guilermina Marcal, hodi koalia asuntu edukasaun nomos liga ho kontrusaun neebe tempu badak enjeneiru husi nasaun Abu Dhabi neebe sei mai halo kontrusaun iha Balide.
(eme)
