DILI, STLTIMORLESTE.com – Primeiru Ministru (PM), Kay Rala Xanana Gusmão hatete, problema neebe mak sei permanese hela husi Governu anterior mak Fronteira Terrestre no Fronteira Maritima, tanba nee sei buka atu rezolve uluk Fronteira Martima depois ba Naktuka.
Nia dehan, temi Fronteira Marítima, ba dala uluk tenke komprende katak governu foun iha deit nee rai kiik oan ida ho populasaun milhaun 1.2 abitantes mos atu primeiru anu kualker governu sei haree, iha neeba ho populasaun milhaun 280 abitantes ho arkipelogu Sumatra, Jawa, Sulawesi no selu-seluk tan, tanba nee tenke komprende ida nee.
“Agora komu problema neebe sei permanese hela husi Governu anterior mak Fronteira Terrestre no Marítima, ho ida nee mak hau ba iha Indonezia ho Prezidente Indonezia, Prabowo Subianto dehan, ita nia relasaun lao diak, kapas tebes-tebes, maibe hakarak fo lembra deit katak, ita iha kazu fronteira nian mos seidauk rezolve mak terrestre no marítima no bolu atensaun ba marítima nian liu-liu, tanba ho Australia ita iha tiha ona, ho Indonezia seidauk iha,” Xefe Governu hatoo kestaun nee ba jornalista sira, bainhira remata halo enkontru ho Prezidente Republika iha Palasiu Prezidensial, Nicolau Lobato, Bairo Pite, Dili, Kinta (16/01/2025).
Xefe Governu hatutan, atu temi ka kompara oituan ho Naktuka, bainhira Fronteira Marítima iha tiha, TL kontrola nia tasi, peska ilegal, ro ilegal sira mai hasai ikan no estraga tan ikan sira, no iha mos pasu ruma neebe hatene katak iha neeba defenidu ona hodi haree Greater Sunrise hotu, ida neeba mos nafatin sustenta no fo osan barak liu.
Ho ida nee mak temi ida nee, uluk kedas ho Indonezia sira sempre dehan tuir direitu internasional rai mak komanda tasi.
“Rai mak marka Fronteira Marítima no ami dehan ba sira, imi labele haluha Oekusi ninia Fronteira Terrestre, husi Mota Ain ba too Salele loos tiha ona no momentu agora ita atu kompara Fronteira Naktuka sira lao ba mai sikat hela no ida importante liu Fronteira Marítima,” katak PM, Xanana.
Indonezia tuir Xefe Governu, agora laos hanesan uluk neebe dehan Fronteira Naktuka uluk tiha lai, mas agora depende hahu daudaun ona laos Oekusi nian tanba ketak, maibe hahu daudaun ona iha rai boot nee.
“Tanba nee hau foti ida nee tanba sira muda tiha ona sira nia hanoin, pozisaun kona-ba tenke hein Naktuka,” hatete Xefe Governu.
Primeiru Ministru fiar, bainhira Timor Leste ho Indonezia rezolve ona problema Fronteira Maritima, fasil halo kontrola ba peska ilegal iha tasi laran.
(eme)