DILI, STLTIMORLESTE.com – Tribunal Judisial Primeira Instansia Dili (TJPID) iha loron Kinta nee (02/07/2026) halao julgamentu ba arguidu ho inisial MM, neebe lori katana taa ofendidu nain tolu ho inisial PS, PSdS no MA,
neebe akontese iha Munisipiu Ermera.
Iha indisus sufisiente katak, iha loron 12 fulan Novembru tinan 2025, iha oras tuku 18h00, ofendidu PS koalia hela ho Miguel nia ferik oan Agusta Sarmento iha sira nia uma neebe lokaliza iha Aldeia Aimetrema, Suku Grotu, Postu Administrativu Lete Foho, Munisipiu Ermera.
Derepente arguidu mai kaer katana ida iha liman, no arguidu lori fatuk tuda primeiru ba iha ofendidu PS nia uma janela hodi kona vidru rahun, no arguidu kontinua kaer fatuk tuda segundu no terseiru kona iha ofendidu nia uma kalen.
Tuir mai arguidu hakilar ho lian makaas hodi hasai lia fuan mal ba ofendidu PS. No tuir mai ofendidu PSdD koalia ba iha arguidu katak, koalia deit lalika tolok.
Arguidu hatan ba iha ofendidu PSdD katak, o tama agora o mate. Arguidu lori katana taa dala ida ba iha ofendidu PSdD maibe ofendidu defende aan ho mangera ida no ikus mai mangera nee kotu tiha, hodi katana kona fali ofendidu PSdD nia ulun.
Ofendidu PSdD hases aan husi fatin refere, maibe arguidu duni tuir ofendidu PSdD too iha ofendidu PS nia uma, hasoru ofendidu MA arguidu lori katana atu taa MA no ikus mai katana nia kroat konaba ofendidu MA nia liman.
Depois arguidu ba iha ofendidu PS nia uma, lori katana taa dala ida iha ofendidu PS nia liman, depois ofendidu PS lori ai pedasuk ida baku ba iha arguidu monu ba rai hodi katana haksoit sai husi arguidu nia liman.
Ofendidu PSdD nia feen lori ofendidu PS ba subar iha sira nia uma, arguidu kontinua buka ofendidu PS hodi taa no arguidu hakilar katak, ida sei monu mak hau sai husi nee.
Konsekuensia husi arguidu nia hahalok, ofendidu nain tolu PS, PSdD no MA hetan kanek iha liman no ulun.
Tanba nee Ministeriu Publiku akuza arguidu komete krime Danu Simples neebe previstu iha artigu 258, krime Arma Branka lei numer 05/2017, Krime Homesidu Simples ho Forma Tentada previstu iha artigu 138 Kodigu Penal, no krime Ofensa Integridade Fisika Grave previstu iha artigu 146 husi Kodigu Penal.
Hatan ba faktus nee arguidu deklara katak, momentu neeba arguidu iha uma tur hela, no arguidu sira hela besik malu ho ofendidu sira.
Arguidu deklara, arguidu ba ofendidu PS nia uma ho liman mamuk foin koalia ofendidu PS foti ai ida atu baku ba iha arguidu iha ofendidu nia uma, maibe arguidu la haree Miguel ho nia feen. Arguidu foti fatuk tuda tiha ofendidu PS nia uma, depois arguidu fila tiha mai iha nia uma no arguidu nega la hasai lia fuan mal ba ofendidu PS.
Arguidu deklara, nia la koalia lia fuan mal ba ofendidu PS no ofendidu PSdD. No momentu neeba ofendidu sira ba ataka arguidu no sira sadik arguidu katak o la barani taa tok, tanba nee mak arguidu haree katana latan hela iha rai foti hodi taa sira.
Arguidu deklara, taa dala ida iha PS nia kabas kanek no raan sai, taa dala rua iha PSdD kona iha ulun dala ida kanek no raan sai, no ikus mak ofendidu MA kona iha nia liman dala ida kanek no raan sai barak, no ikus mai arguidu halai ba iha kafe laran kontaktu Polisia ba foti arguidu no ofendidu sira.
Arguidu deklara, motivu husi problema nee tanba arguidu nia rai ka tos kuda tiha ai farina, kontas, talas, maibe ofendidu sira ba losu sai no tetak rahun tiha. Arguidu rekonhese rai nee arguidu nian.
Arguidu deklara, ofendidu sira hamutuk ba tuda arguidu nia uma, tanba nee mak arguidu halai sai husi nia uma hodi halai, ofendidu sira kontinua duni tuir, iha dalan arguidu haree katana ida, tanba nee mak arguidu foti katana hodi taa ofendidu sira.
Ofendidu PS deklara katak, momentu neeba arguidu ba lori kedan katana hodi koalia lia fuan mal. Deklara arguidu taa uluk ofendidu MA dala ida, taa segundu ba iha ofendidu PSdD dala ida, no ofendidu PS dala ida iha kabas no liman dala ida.
Ofendidu PS deklara katak, hahu husi hetan ta to mai agora arguidu kaer servisu la dun diak, no osan neebe gasta ba halo tratamentu hamutuk dolar hitu nulu. Ofendidu nega laos nia maka tesi ai horis iha arguidu nia tos laran.
Ofendidu PSdD deklara katak, momentu neeba arguidu hasai lia fuan mal ba iha ofendidu PS tanba nee maka ofendidu PSdD dehan ba arguidu katak, koalia deit labele tolok.
Ofendidu deklara, ho ida nee halo arguidu la simu mosu diskusaun, too arguidu lori katana taa dala ida ba ofendidu kona iha ulun klaran, suku pontu sia no baixa iha hospital durante fulan ida.
Aleinde nee ofendidu MA deklara katak, momentu neeba arguidu lori katana taa dalan ida ba ofendidu, husi akontesimentu too mai agora ofendidu sei sente moras too agora.
Rona tiha deklarasaun husi arguidu no ofendidu sira, Tribunal adia ba loron seluk hodi rona sasin.
Audensia julgamentu nee prezide husi Juiz Kolektivu Jose Maria, Ersilia de Jesus, Ana Paula, Ministeriu Publiku (MP) reprezenta husi Prokurdor Ricardo Leite, arguidu hetan asistesia legal husi Defensor Publiku Henrique Mariz.
(ter)
