DILI, STLTIMORLESTE.com – Oras nee daudaun profesores husi Eskola Sekundariu Jeral 10 de Dezembro Comoro, hahu elabora ona pontus ezame segundu periodu, neebe tuir kalendariu sei halao iha loron 13 Julhu 2026.
Lia hirak nee hatoo husi Diretor Eskola Sekundáriu Jeral 10 de Dezembro Comoro, Manuel Verdial ba STL iha nia knaar fatin Comoro, Segunda nee (29/06/2026).
Nia dehan, agora daudaun kada profesores husi disiplina ida-idak hahu elabora ona pontus ezame segundu periodu nian neebe mak estudantes sira sei halao iha loron 13 Julhu tinan ida nee.
“Ezame segundu periodu nee ita sei halao iha loron 13 fulan Julhu, husi parte eskola nian preparasaun ba ezame nee, tanba ami toman ona, lao tuir programa neebe mak iha ona, liu husi curriculum nasional neebe planeadu ona. Eskola nian orientasaun hotu atu nunee buat hotu bele lao ho diak, husi eskola prepara ona komisaun organizadora ba iha ezame segundu periodu ninia, ho nunee bele halo preparasaun neebe mak diak liu ba iha ezame refere,” nia dehan.
Tuir Manuel, materia husi profesores ba disiplina ida-idak, hodi bele hahu elabora ona pontus ezame nee, ho nunee too iha ezame nee buat hotu preparadu hotu ona, kona-ba elabora pontus ezame nee agora daudaun lao hela, nee duni profesores sira elabora daudaun pontus ezame, hodi prepara para too ezame nee organizadu ona, tanba ezame refere falta semana ida tan para estudantes sira bele partisipa iha ezame.
“Total ita nian estudantes neebe mak sei partisipa iha ezame segundu periodu nian hamutuk 1644, numeru estudantes ida nee mak sei partisipa iha ezame segundu periodu nian, neebe sei halao iha loron 13 Julhu,” dehan nia.
Manuel hatutan, husi eskola kria ona komisaun organizadora ba iha ezame refere, ho nunee bele halo preparasaun neebe mak diak ba iha ezame, kria uluk komisaun mak agora daudaun profesores sira hahu elabora ona pontus ezame ninia nee.
“Ita tenke antisipa hodi haree buat sira nee hotu. Hau nuudar direjente husi eskola ida nee husu nafatin ba ita nian estudantes sira, tanba agora ita nian profesor sira elabora pontus ezame ninia, husu ba estudantes sira, imi mak futuru ba rai ida nee, ita nian avo sira neebe mak uluk luta nee, agora ida-idak husik hela ita, maske sira laiha ona, maibe ho sira nian liafuan neebe uluk motiva ita, ho sira nian liafuan balun neebe husik ho sira nian hahalok, maibe ita kontinua hametin,” dehan nia.
Nia dehan, estudantes sira tenke estuda, tanba tempu badak sira sei partisipa iha ezame segundu periodu ninia, sira presiza prepara estuda, tanba antes nee estudantes sira hotu partisipa ona iha aula, nunee kada disiplina sira hetan ona husi profesor sira, tanba nee tenke estuda.
Entretantu Julio Maia da Costa, nuudar estudantes husi ESJ 10 de Dezembro Comoro dehan, daudaun nee prepara aan estuda, tanba falta semana ida sira hahu halao ezame segundu periodu, liu husi estuda mak buat hotu fasil iha ezame.
“Agora daudaun nee ami tenke prepara aan estuda, tanba falta semana ida sira hahu halao ezame segundu periodu, liu husi estuda mak buat hotu fasil iha ezame,” nia esplika.
(jac)
