DILI, STLTIMORLESTE.com – Profesores idade reforma hamutuk 3.931 hatama pedidu rekerimentu ba Ministériu Edukasaun (ME), dadus ida nee husi 2022 mai too ohin loron.
Lia hirak nee hatoo husi Diretor Nasional Rekursu Umanus ME, João Amaral ba STL iha nia knaar fatin Vila Verde, Kuarta (05/02/2025).
“Ita iha planu hotu ona, tuir dekretu lei neebe mak prezidente promulga ona, maibe too oras nee ita seidauk halo sosializasaun ba lei nee rasik, entaun husi parte ME liu husi Diresaun Rekursu Umanus, ita iha ona dadus ba profesores neebe mak ho idade reforma obrigaroriu. Dadus provizoriamente ida neebe mak uluk ami iha nee 3.931, neebe mak liu husi pedidu neebe sira hatoo mai iha ME no rekomenda ona. Dadus nee hahu husi 2022, 2023 too mai agora,” afirma João Amaral.
Nia dehan, dadus profesores idade reforma nian neebe ohin mensiona nee sira mak mai hatama direita iha ministeriu, nee bazeia ba sira nian rekerimentu, iha momentu neeba lei reforma obrigatoriu ba sira seidauk, entaun depende pesoal neebe ho situasaun kondisaun hakarak reforma, nee nia rasik halo pedidu rekerimentu, no rekomenda ba komisaun trata seguransa sosial hodi hasai desizaun reforma, tuir pedidu rekerimentu neebe sira nain hatoo mai Ministeriu.
Nia katak, atu reforma iha sira nian fatin, nee iha ona planu. Nee mak liu husi kolokasaun neebe halao daudaun ona, maibe bazeia ba nesesidade eskola nian profesores presiza, liu-liu ba eskola neebe menus profesores.
Iha fatin seluk, Diretor Edukasaun Munisipiu Likisa, Julio da Silva hatete, profesores 39 nee too agora seidauk hatama karta rekerimentu ruma ba ME, no sira halao knaar iha eskola lao hanesan baibain, halao aprendizajen ba estudante sira, numeru lista reforma professores iha Likisa mak hamutuk 39.
(jac)